Tuir komunikadu ne’ebé Online INDEPENDENTE asesu iha pajina Prezidénsia Repúblika relata, nesessidade bázika ne’ebé apoia ba komunidade sira Suku refere, iha aldeia tolu hanesan wadaboru, sa’ebere no saewa mak hetan. Nesesidade bázika sira ne’e mak hanesan, fo’os, mina, supermi no seluk tan.
“Ha’u observa direta iha baze, komunidade ne’ebé koopera malu servisu iha grupu, hodi ida-ne’e mak ha’u halo proposta ba assessor sosiedade sivíl assuntu sosiais, ho ida-ne’e mak ekipa husi gabinete prezidente bele lori sasán to’o mai iha komunidade,” hateten, Reprezentante servisu apoiu sosiedade sivíl Prezidénsia Repúblika, Domingos Sávio Freitas.
Iha sorin seluk Xefe Aldeia Wadaboru Suku Gursá, Postu Kelikai, Muníspiu Baucau, José Fonseca, agradese ba Xefe Estadu, tanba bele fó ona apoiu hanesan nesessidade bázika ba nia komunidade.
Nia dehan, estrada husi Suku Gursá ba iha aldeia wadaboru, ho voluntariamente ke’e no loke rasik husi komunidade sira, hahú iha loron 2 marsu to’o 31 abríl 2021 ho kilométru 3 resin.
“Ami agradese ba na’i Prezidente ne’ebé konsidera ami povu wadaboru bele apoiu ai-han ba ami povu wadaboru, maibé, hakarak hato’o ba media, ami-nia estrada wadaboru, ami hahú ke’e voluntariamente iha dia 2 marsu 2021,” hatete Xefe Aldeia ne’e.
Autoridade lokál ne’e haktuir, to’o iha loron 13 marsu 2022, maka sira hetan apoiu Programa Nasionál Dezenvolvimentu Suku (PNDS) Suku Gursá nian, inklui obras públika munisípiu Baucau mós apoiu ekipamentu pezadus balun hodi loke dalan refere.
“Presiza duni (loke estrada), tanba área ne’ebá ne’e ami-nia produtu lokal barak, maibé, susar ami atu asesu ba merkadu, tanba ne’e mak ami hola inisiativa, momentu ne’ebá ami kontribui osan rihun $3 resin mak loke estrada,” tenik nia.
