“Presidente Repúblika preokupa teb-tebes liliu ho krime organizadu sira hanesan falsifikasaun dokumentu ne’ebé akontese iha Komisaun Omenajen (no) envolve veteran balun,”hatutan Prokuradór Jerál Repúblika, José Ximenes ba jornalista sira, hafoin enkontru ho Xefe Estadu, segunda ohin, iha palacio Presidensiál, Bairo Pite Dili.

Tanba ne’e, Xefe Estadu  husu Ministériu Públiku atu kontinua assume nia knaar no responsabilidade ho imparsial no independente hodi investiga kazu krime organizadu tuir prosesu legal.

PJR ne’e, triste veteranu balun luta ba independénsia ba envolve fali iha kazu sira.

Nia dehan, iha loron 16 Outubru fulan ne’e, Tribunál Distritál Dili hola desizaun final aplika pena prizaun efetivu tinan lima ho tinan sia ba arguidu na’in sia ba arguidu na’in lima tanba faktu provadu falsifika dokumentu hodi simu pensaun husi estadu ho montante global $93,547.00.

Kazu ne’e envolve husi arguidu no arguida na’in sia, hanesan Joaquim Silva “Mate Restu” (veterana ida), Osvaldo Paulo, Mario de Araújo, Marcelino Pereira, Agostinha da Costa Maria, Constantino de Jesus Maia, Celio Maria Noronha Lay, Delio de Jesus Lobo Campos no Domingos Mendonça.

Arguido sira ne’e balun servisu Komisaun Omenajen, Ministériu Solidariedade Sosial no Inkluzaun, Sekretáriadu Tékniku Administrasaun (STAE) no Banku Nasional Ultramarinu (BNU).

Ho desizaun Tribunal Distritál Dili, MP sei halo rekursu hasoru arguidu na’in rua, ne’ebé Tribunál absolve, tanba Komisaun Omenajen haruka karta ba banku ho dokumentus no banku halo pagamentus maski hatene katak dokumentus falsu.