“Alokasaun osan justu liu entre dezenvolvimentu umanu no dezenvolvimentu fíziku no gradualmente despeza labele boot liu reseita”, dehan PR Lú Olo, iha Palasiu Prezidensiál, Bairru-Pité, horisehik.

Nia husu mós, atu investimentu sira hotu ne’ebé finansia husi Orsamentu Jerál Estadu (OJE) bazeia ba kritériu retornu sosiál no ekonómiku ida aas ba beibeik.

Xefe Estadu apela ba Governu atu orsamentu sira ba tinan sira oin mai, tenke bazeia ba prinsípiu sustentabilidade Estadu no sosiedade rasik, katak persentajen finansiamentu boot liu hahú mai husi reseita la'ós mina-rai, ne’ebé aumenta ba bei-beik, husi ekonomia diversifikadu no produtivu liu.

Husu mós atu alkansa nivel reseita doméstika ne’ebé bele redús gradualmente dependénsia finansiamentu OJE husi osan Fundu Mina-rai, maka governu tenke aselera prosesu preparasaun no implementasaun reforma fiskál.

Nune’e, tenke hatene prepara, ezekuta no fiskaliza, jere di’ak liu tán OJE nu’udar instrumentu finanseiru ne’ebé bele finansia kresimentu ekonómiku no dezenvolvimentu sosiál.

Importante mós atu hanoin katak ne’e prosesu ida ke presiza ezijénsia no persisténsia husi tinan ida ba tinan seluk, husi fulan ida ba fulan seluk, husi loron ida ba loron seluk. Ho nune’e, bele hahú daudaun ona hadi’ak moris ho forma efetivu liu.