Tuir informasaun, keixa ne’e hato’o direitamente husi espoza Prezidente Repúblika, Cidalia, ba Polisia Nasionál Servisu Investigasaun Kriminal (PNSIK).

“Ami simu ona denunsia husi Prezidente Republika ho ninia espoza, no ami identifika ona autor publikasaun fotografia iha media sosial (Medsos),” informa Sub Xefe Servisu Investigasaun Kriminal Nasionál, Inspetór Xefe Mouzinho T. Correia ba jornalista sira iha Kuartel Jeral PNTL, Kaikoli, Tersa (18/09).

Nia hatete, PNSIK iha ona indisiu ba autór balun ne’ebé halo publikasaun ba fotofrafia Prezidenti Republika ho ninia espoza.

Mouzinho hatete, kazu publikasaun fotografia kuaze kleur ona. Maibé prosesu ba kazu ne’e la la’o tanba durante ne’e juiz sira iha hela periodu feriadu. Tan ne’e PNSIK la hetan delegasaun kompotensia.

“Ita bele dehan prosesu ne’e la hetan progresu tanba la hetan kompetensia, entaun prjudika ami-nia servisu,” katak nia.

Ho keixa ne’ebé PR Lu Olo ho nia espoza hato’o, nia dehan, iha tempu besik PNSIK sei bolu suspeitu sira hodi halo prosesu investigasaun.