Ministru Obras Públika (MOP), Salvador Eugénio Pires hateten, Tribunál Rekursu haruka ona karta rekomendasaun ba MOP, nune’e Governu sei deside atu loke tenderizasaun ba empreza nasionál sira atu konkorre prosesu tenderizasaun.

Tuir nia, mandatu Kompañia ETO sei termina iha Marsu 2019, maibé Governu sei estudu no konsulta ho autoridade seluk bainhira foti desizaun.

“Ami halo hela servisu preparativus ba ida ne’e”, dehan Ministra Salvador, iha Palasiu Governu, foin lalais ne’e.

Governante ne’e mós rekoñese kooperasaun servisu di'ak ne’ebé kompañia ne’e hatudu, tanba durante tinan ida nia laran Estadu Timor-Leste hasoru krize polítika, ne’ebé afeta ba krize finanseiru maibé mantein fornese kombustivel ba EDTL.

Kontratu servisu ba fornesimentu entre Governu ho kompañia ETO no Sacom hahú ona dezde 2016 liubá.