Prezidente José Ramos Horta hatete, premio ne'ebé manan na'in sira simu ne’e, kategoria ba diretu, ekonomia, sosial no kultural nian, maibé laós direitu ba sivil no politika.
“Ohin 10 Dezembro 2024, sira ne’ebé simu, iha kategoria ba direitu, ekonomia, sosiais no kulturais, la’os iha direitu sivil no politiku, ha’u hatete ba ha’u nia staf ne’ebé ita hare kada premiadu kandidatu ne’e nia la monu iha direitu sivil no politika, maibé iha direitu sosiais, ekonomia kulturais,” dehan Prezidete Republika iha Palasiu Prezidensial ai-tarak Laran, Tersa (10/12).
Prezidente ne’e hatutan, iha Timor-Leste direitu, sosial, ekonomia no kultural mak sei buka atu hadi'a, tanba nasaun sei iha pobreza nia laran tanba injustisa.
Nune'e Xefe Estadu, hato'o parabens no agradese boot ba premiadu sira, maske sidadun ne’ebé simples maibé kontribui ona hodi hakman povu nia terus no kontribui ba hakman estadu nia todan no responsabilidade.
“Ha’u la fó deit parabens ba sira, maibé ha’u fó agradesementu boot bá sira, tanba ne’e sidadaun sira simples, amu padre ida Franciscano simples no sira kontribui bá hakman povu nia terus kontribui ba hakman estadu nia todan iha responsabilidade, ha’u kontenti los ho sira ida-idak nia servisu inklui difisiente ida,” katak PR.
Iha fatin hanesan Premiadu Hipolito Alves do Santos hatete, hanesan manan nain senti kontenti, nune'e liu husi premio ne'e motiva liu tan sira hodi luta ba iha direitu umanus, ekonomia sosial no kultural.
“Hanesan premiadu ne’ebé ohin simu sertifikadu, senti kontenti ho responsabilidade tomak, tanba ita hatene katak premiu ne’ebé ohin ha’u simu ne’e premiu kona-ba direitu ekonomia sosial no kultura, signifika katak ita prosesu barak sei ba oin, no luta foun sei iha,” dehan Pemiadu.
Entretantu, premiadu na’in lima ne’ebé hetan primio Sergio Vieira de Mello mak hanesan, Viquiano Gama da Costa, Sentru Dezenvolvimentu Inkluzivu, Padre Augusto Hermenegildo Nunes, ofm, conv, Hipólito Alves dos Santos no Ezequiel Fernandes de Oliveira.
Premio ne’e atribui bazeia ba dekretu lei numeru 15/2009 loron 18 fulan-marsu, kada vensedor simu sertifikadu inklui osan dolar ameriknau ho montate rihun $10.
Enkuantu, iha seremonia atribuisaun premio refere partisipa husi Primeiru Ministru Kay Rala Xanana Gusmão, diplomata inklui membro governu balun.
