Dialogu públiku ne’e hola parte iha atividade ida husi selebrasaun loron 16 ativizmu kontra Violensia Bazeia ba Jeneru (VBJ) ho tema “Hamutuk Ita Prevene Violensia Hasoru Feto Hodi Promove Igualidade Jéneru Asegura Feto nia Direitu Umanus Liu Husi Empoderamentu Ekonomia”.
Diretóra Ezekutiva FOKUPERS, Domingas Afonso Amaral, hatete, Violensia Bazeia ba Jeneru (VBJ) sai nafatin dazafiu seriu ne’ebé kontinua buras iha Timor-Leste.
“Violensia hasoru feto sai hanesan problema global hanesan forma husi violensia direitus humanus partikularmente fó impaktu bá feto labarik feto no komunidade sira nia moris,” dehan Diretora iha salaun Delta-Nova, Segunda (09/12).
Diretora Domingas esplika, FOKUPERS parseira ho WVTL realiza dialogu píbliku ida ne’e, la’ós deit atu hasa’e konsiensia públiku nian, maibé oinsa ema hotu-hotu hamutuk hanesan governu, igreja, ajensia nasional no internsional, organizasaun Sosiaedade sivil lideransa komunitariu, individu no jovem foinsae sira hotu hola parte hodi luta ba hakotu siklu violensia hahu husi aan rasik no kontinua halo esforsu hodi kontribui bá mudansa feto no labarik feto sira nia moris diak.
Iha fatin hanesan, Diretor Nasional WVTL Jaret Berends hatete, liu husi diálogu públiku iha ambitu selebrasaun loron 16 ativizmu kontra violensia hasoru feto no labarik feto iha Timor-Leste, Word Vision Timor-Leste hamutuk ho parseriu implementador hanesan FOKUPERS ho FEEO ho foinsae sira hodi fahe informasaun kona-bá importansia husi violensia hasoru feto no labarik feto iha komunidade no hasa’e kapasitasaun feto iha ekonomia no negosiu.
“Word Vision Timor-Leste hanesan organizasaun ida ne’ebé eziste ona iha tinan 1995, nune’e ami rekoñese katak violensia bazeia ba jeneru mak hahú husi desigualidade, normas, kultura no sosial sira ne’ebé kontribui bá violensia hasoru feto no labarik feto,” dehan Diretor Nasional WVTL.
Iha biban ne’e, Sekretaria Estadu ba Igualidade, Elvina Siusa Carvalho hatoo apresiasaun ba organizasaun nasional no internasional, Sosiedad sivil, no mós governu, ne’ebé halo ativdades oioin iha kapital no mós munisipiu hodi prense loron 16 ativizmu kontra violensia hasoru feto no labarik feto.
Governante ne’e dehan, kampaña loron 16 ativismu kontra violensia hasoru feto no labarik feto ne’e mós hanesan kampaña internasional ne’ebé Timor-Leste hola parte ona desde uluk hodi foti asaun ho determinasaun firme kontra violensia hasoru feto no labarik feto sira.
“Ita hotu hakarak ita nia sosiedade hahú husi uma laran, turi instituisau, fatin públiku sira seguru ba ita bá ita nia inan-aman liuliu feto no labarik feto sira grupu vulneravel sira, hau hanoin portadora difesiensia no LGBTIQ sira,” nia hakotu.
