Nia dehan, tanba foin daudauk iha konsertu estadium, kampu ne'e nakonu ho joven sira, maibé kapás tanba la akontese buat ida, di'ak ona, di'ak tebe-tebes nune'e ohin mós informa ba Prezidente Repúblika.

"Seidauk, sorti bo'ot ona, foin daudauk iha konsertu ba hein, hein loron dahuluk, ami ba udan beibeik, loron daruak ba hein oras rua iha ne'eba hahú haree ba tanba nakukun hela, ha'u sa'e ba leten estadium, kampu ne'e nakonu ho joven sira. Mas kapás tanba la akontese buat ida, di'ak ona, di'ak tebe-tebes ohin mós ha'u informa ba Prezidente Repúblika kapás tebe-tebes, joven sira komesa hatudu daudauk ona katak hatene saida mak estabilidade, saida mak harmonia," dehan PM Xanana, iha Palásiu Prezidensiál, Bairru-Pité, horisehik.

Nia afirma, fraternidade umana ne'ebé Papa Francisco lori mai ne'e hela iha sira nia fuan.

Antes ne'e, soru-mutu Konsellu Ministru ordináriu, Kuarta (30/10), iha Palásiu Governu, aprova projetu Rezolusaun Governu nian ida hodi kontínua halo suspensaun ka hapara atividade sira prátika grupu arte-marsiál nian bá fulan neen (6) tan.

Rezultadu Konsellu Ministru nian iha ne’ebé fó sai katak, rezolusaun Governu ida ne’e estende, to’o 10 Abríl 2025, suspensaun bá ensinu, aprendizajen no prátika arte-marsiál no enserramentu temporáriu bá fatin no instalasaun hotu-hotu ne’ebé destinadu bá ensinu, aprendizajen no prátika arte-marsiál, ne’ebé inisialmente hetan aprovasaun husi rezolusaun governu númeru 17/2024, loron 24 Abríl.

Objetivu husi rezolusaun governu nian ida-ne’e atu konsolida no reforsa pás sosiál ne’ebé alkansa ona husi kedas Novembru 2023.

Ho abordajen ne’ebé konsideradu no kontroladu, hakarak atu iha futuru, permite prátika artes marsiais nian iha de’it kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira. Maibé, iha tempu ida-ne’e, nafatin mantein suspensaun ba ensinu, aprendizajen no prátika arte marsiál no enserramentu temporáriu ba ninia fasilidade sira.

Governu mós felisita populasaun, liu-liu joven sira, ba kolaborasaun ne’ebé sira presta ona hodi kumpre rezolusaun Governu númeru 17/2024, loron 24 fulan-Abríl, ne’ebé kontribui tebes ba manutensaun orden no pás sosiál iha país laran tomak.