PM Xanana hatete, Orsamentu Jerál Estadu (OJE) 2025 ho montante billaun $2,6 ne’ebé Prezidente Repúblika, José Ramos Horta, promulga ona, sei fó benefísiu direita ba povu liu husi progresu servisu governu nian.
"Sim, benifisiu ba povu ne'e lá'os atu fó osan ba povu, benefisiu ba povu se ita halo eskola ida iha área rurál povu hetan benifisiu tanba sira-nia oan sira iha ne'ebá, mais tenke halo ho rezidensia ba professor tanba tenke iha ne'eba. Halo karik klínika mós benifisiu ne'e lá'os benifisiu indireitu ne'ebé sei halo".
"Ha'u mós informa ba Prezidente Repúblika, ha'u dehan tiha ona iha Parlamentu Nasionál kada trimestre ha'u sei la'o haleu, tanba ha'u hatene governu ninia programa ba iha fatin ida ministériu ne'ebé haree halo ona ka la'e, halo nusa, tenke halo, mais halo ho kualidade," dehan PM Xanana ba jornalista sira hafoin enkontru semanál ho PR Horta, iha resintu Palásiu Prezidensiál Bairu-Pite, Kinta (05/12).
Xefe governu ne’e hatete, nia sei esforsu nune’e iha 2026 bele prova katak governu halo duni saida mak promete ona.
“2025 sei sai ano implementasaaun, saida mak ami tau iha ne'ebá, ami sei implementa,” katak nia.
Molok ne’e, Prezidente Repúblika, José Ramos Horta, promulga Orsamentu Jeral Estadu ba tinan 2025 ho montante billaun $2.6. Promulgasaun ne’e konsidera lalais, tanba Xefe Estadu foun simu OJE 2025 husi Prezidente Parlamentu Nasionál iha Segunda (25/11), dader.
PR Horta hatete, nia promulga lalais OJE 2025 ne’e tanba iha fulan hirak nia laran nia simu tiha ona kopia no estuda kleur ona.
"Ohin (25 Novembru) dader ha'u simu Prezidente Parlamentu Nasionál entrega ba ha'u Orsamentu Jerál Estadu 2025, ha'u promulga tiha ona, tanba fulan hirak nia laran ha'u simu tiha kopia ida, no ha'u estuda kleur tiha ona, ne'ebé laiha problema konstitusionál.”
“Fretilin ho PLP vota kontra la hatene tanba sa, maibé ha'u fira la'ós kestaun konstitusionál. Purtantu fulan ida nia laran maizumenus ha'u simu tiha ona, estuda kleur tiha ona, ne'eduni ohin kedas ha'u promulga," deklara PR Horta ba jornalista sira bainhira akompaña Deputada Repúblika Indonézia, Julie Laiskodat, vizita konventu Madre Alma, Bebonuk, Segunda (25/11).
Tuir Horta, buat ne’ebé nia la konkorda iha governu ne’e la’os orsamentu maibé seidauk iha reforma maka'as ba instituisaun públika ne'ebé barak demais iha Timor-Leste.
"Ha'u espera 2025 governu estuda ne'e didi'ak tanba maun Xanana mós uluk hatete instituisaun públika barak demais, no barak la servisu, servisu saida? Eletrisidade mate moris, bee mate moris, farmasia medikamentu sempre problema, sira servisu saida? Hanesan SERVE servisu saida? Maibé prontu ne'e lá'os kestaun ida konstitusionál, ne'e kestaun governasaun, Primeiru Ministru mak tenke haree ne'e ba oin," dehan PR Horta.
Enkuantu, Prezidente Parlamentu Nasionál, Maria Fernanda Lay hafoin hasoru PR Horta hatete, nia lori OJE 2025 hodi entrega ba PR Horta.
"Ha'u hanoin Primeiru Ministru mak halo orsamentu, Primeiru Ministru mai uluk ne'ebé ha'u lalika ko'alia barak, ha'u fó hatene prosesu la'o oinsá, laiha viola demokrásia, nein rejimentu, embora husi opozisaun trata nune'e mais la loos,” dehan Prezidente PN ne’e.
