Prezidente Repúblika José Ramos Horta, hatete, Bainhira nia parte simu konvite atu partisipa iha atribuisaun sertifikadu husi Komite Sentral Fretilin (CCF) nia sei ba. Tanba ne’e, hanesan fundador sempre respeita memoria hotu iha FRETILIN,  ne'ebé mate iha tempu luta ba ukun rasik-aan.

“Ha'u 27, ha’u sei sai ba liur no ha’u sei fila iha loron 31 loraik, se ha’u simu konvite ha’u bá, ha’u sempre la haluha fundador, ha’u bele fundador, ha’u nia kontribuisaun ne’e fraku, maibé ASDT ne’e ha’u fundador, agora FRETILIN ha’u fraku oituan karik, ha’u sempre respeita memoria hotu-hotu iha FRETILIN ne’ebé iha tempu luta,” dehan Prezidete Republika iha Palasiu Prezidensial Ai-Tarak Laran, Tersa (10/12).

Enkuantu, molok ne’e, iha loron 7 fulan-Dezembru tinan ne'e, Komisaun Sinkuentenariu FRETILIN realiza reflesaun memoria 7 Dezembru 1975  ba dala-49 no Ezistensia FRETILIN ba 50, iha salaun 3 de Marsu Maubai Komoro.

 Iha ambitu reflesaun ne’e, Sekretáriu Jerál Partidu FRETILIN Mari Alkatiri hatete, maske Prezidente Republika la partisipa iha seremonia reflesaun 7 Dezembru ne'e, maibé nia parte iha esperansa katak iha 31 Dezembro, Prezidente Repúblika sei simu sertifikadu konabá kontribuisaun sira husi luta ba ukun rasik an.

"Prezidente la partisipa iha ida ne'e, maibé ha’u iha esperansa katak iha 31 Prezidente Repúblika sei simu sertifikadu," Mari Alkatiri hakotu.