“Ami husu bainhira mandatu remata labele tama kualkér partidu,” David Ximenes, komunidade Santa Cruz, bainhira halo diálogu komunitaria ho Prezidente Repúblika, iha Suku Santa Cruz, Sábadu (28/1).

Nia hatutan, tanba agora lider rezisténsia sira seluk tama hotu iha partidu polítiku hodi haree malu matan la moos, tanba sira defende ida-idak nia partidu maibé Prezidente Taur di'ak lalika inklina aan iha partidu.

“Ami husu ita boot sai hanesan símbolu ba ami povu tomak tanba ema hanesan ita boot ne’e susar atu hetan,” katak nia.

Hataan ba preokupasaun hirak ne’e, Xefe Estadu hatete, nu’udar Prezidente Repúblika sei laiha partidu, maibé nu’udar sidadaun ne’e iha direitu atu tama partidu polítiku.

“Ha'u nu’udar prezidente ne’e tenke independente, maibé kuandu iha loron 20 fulan-Maiu ha’u entrega tiha ha'u nia pozisaun ne’e ba prezidente foun, iha loron 21 fulan-Maiu ha’u sei tama partidu. Tanba ha'u aprende polítika, ne'ebé ha'u mate ho polítika,” dehan Taur.

Entretantu Xefe Estadu ne’e hateten, kona-ba símbolu povu no nasaun maka hino Nasionál Pátria-Pátria ho Bandeira RDTL, maibé la'ós ema maka símbolu no ema mós sei la fahe malu mezmu partidu, lian, relijiaun ketak-ketak, maibé ida ne’e buat ketak ida.