Komisáriu Funsaun Publika (KFP), Maria Olandina Caeiro hateten, ba tinan ne’e iha mudansa uitoan saláriu ba funsionáriu públiku ho ajustamentu.

“Funsionáriu públiku kuaze dez mil-resin, ne’e la’ós buat uitoan. Ne’ebé, ita sei atraza simu osan fulan ida ka rua tan,” dehan nia, iha Instituto Camões, horisehik.

Prosesu ajustamentu saláriu ne’e loloos hala'o ona iha fulan-Dezembru 2016, maibé iha tempu ne'ebé ema barak hanoin uluk feriadu, entaun problema ne’e demora to’o ohin loron.

Nia esplika, Sira iha divizaun rekursu umanu no finansas iha instituisaun ida-idak iha ninian momentu ne'ebá sira la tuur hamutuk hodi sura, entaun ikus mai sai problema simu osan tarde.

Problema pagamentu tarde la’ós problema KFP no Ministériu Finansas nian, fila-fali ba instituisaun ida-idak atu trata hodi halo ajustamentu.

Antes ne’e, iha fulan-Janeiru Funsionáriu Públiku sira labele simu saláriu tanba Governu sei halo hela ajustamentu hodi aumenta osan ba funsionáriu rejime jerál sira.

Entretantu, Vise-Ministru Finansas, Hélder Lopes promete iha tempu besik nia laran governu sei selu saláriu Funsionáriu Públiku (FP) hotu.

Nia dehan, tinan ne’e, Ministériu Finansas aloka OJE 2017 kada liña ministériu hotu-hotu la’o tarde uitoan, tanba presiza trata dokumentu klaru.

Hélder dehan, fulan Janeiru ne’e saláriu funsionáriu sira nian governu transfere tarde, tanba tékniku sira sei hadi'a sistema balun.

“Ami garantia iha fulan ne’e, Funsionáriu Públiku sira sei simu nia saláriu,” dehan Hélder.

Lori naran governu, Vise-Ministru Hélder husu deskulpa ba funsionáriu hotu-hotu labele hirus governu.