Xefe Suku Maubisse-Villa, Wilson Livio Mendonça hatete, populasaun sira ne’ebé seidauk asesu ba eletrisidade hamutuk atus ida ne’ebé mai husi aldeia tolu hanesan aldeia Riamori, Gulala no Sarlala.
“Komunidade sira ne’ebé seidauk asesu bá eletrisidade bele dehan to’o atus ida (100) no komunidade sira ne’e hela dook malu ne’ebé perkore iha aldeia tolu mak seidauk kobre hotu liuliu ba iha aldeia Riamori, Gulala no Sarlala balun mak seidauk,” dehan Xefe Suku iha Rabilau, Sesta (18/10).
Xefe Suku hatutan, populasaun ne’ebé seidauk asesu ba eletrisidade dadaun ne’e sira uza solar panel, ahi tradisional hanesan lilin, minarai no balun uza osan rasik hodi dada ahi husi viziñu sira ne’ebé asesu ona ba eletrisidade.
“Maioria komunidade iha sira uza solar panel no uza meius tradisionál seluk hanesan sunu lilin, lampu minarai no barak liu dada fali liña husi viziñu seluk ne’ebé asesu ona ba eletrisidade. Ita hanoin katak liña de’it mak seidauk to’o maibé komunidade barak mak uza de’it nia osan privadu sosa fiu hodi tutan husi viziñu ida hodi bá to’o iha sira,” Xefe Suku hato’o.
Ba asuntu ne’e, Autoridade lokal ne’e akresenta, nia parte propoin ona proposta ba Eletrisidade Timor-Leste Empreza Públika (EDTL, EP) no iha ona resposta husu EDTL katak, bainhira festival Rabilau ne’e remata, ekipa husi EDTL sei halo identifikasaun ba populasaun sira ne’ebé seidauk asesu ba eletrisidade.
“Aldeia balun iha Suku Maubisse-vila no komunidade balun ne’ebé viziñu ho suku ida ne’e, sei asesu ba eletrisidade, maibé hanesan autoridade propoin ona proposta ne’e ba EDTL, EP no sira hatete katak depois de festival Rabilau hotu, iha semana ida ka rua mai tan, sira nia ekipa sei mai halo identifikasaun no to’o iha Dezembro sira bele resposta ona komunidade sira ne’ebé seidauk asesu ba eletrisidade,” haktuir Xafe Suku.
Entretantu, Xefe Suku ne’e afirma, hanesan autoriedade lokal nafatin buka meius oioin koopera ho EDTL.EP, atu bele identifika komunidade sira ne’ebé seidauk asesu ba eletrisidade, nune’e iha tinan ida ne’e remata, populasaun hotu bele asesu ona ba liña eletrisidade.
