Prezidente Gurda Turizmu Rabilau, Adelino Mendonça Espíritu Santo hatete, inisiu harii fatin turizmu ne’e hetan ona ápoia husi governu hodi harii infrastrutura bázika sira hanesan dada bee moos, eletrisidade, haris fatin inklui uma tradisionál rua. 

Nia dehan, la'os to'o iha ne'e de'it, maibé buka nafatin atu servisu hamutuk ho governu munisipiu no governu sentrál atu kontinua fó apoiu ba fasilidade sira seluk ne’ebé sei presiza konstrui tan.

"Ami nia prioridade mak presiza nafatin apoiu ba dormitóriu, tanba ami hatene katak fatin ne’e, aban bairua vizitante sei mai barak, vizitante sira ne'ebé hakarak fila bele fila, maibé ba sira ne'ebé hakarak toba ami bele oferese fatin bá," dehan prezidente Guarda turizmu Rabilau kuarta foin lalais (16/10/24).

Hatan ba kestaun ne’e, Primeiru-Ministru Interinu, atual Ministru Koordenadór Asuntu Sosial no Ministru Dezenvolvimetu Rural Abitasaun Komunitária, Mariano Assanami Sabino hatete, governu kompromete sei kontinua hadi’a fatin turizmu sira, la'os to'o iha ne'e de'it, maibé sei hadia mós fatin lubuk ne'ebé iha, no planu sei hari tan uma iha fatin turizmu Rabilau.

"Ita sei harii tan uma lubuk ida, tanba ema mai la'ós atu hela iha ótel, ema mai iha uma ne'ebé tradisional, iha laran kapás, seguru para bele hela maibé liuliu ita nia ema, ita tenki hadi’a ita nia uma bá baiñaka sira, uma di'ak bá ita, uma di'ak bá baiñaka sira, hadi’a ita nia nasaun, hadi’a ita nia estadu, di'ak bá ita ne'ebé hela iha ne'e no di'ak bá baiñaka ne'ebé hela iha ne'e," dehan Vise Primeiru Ministru Mariano Asanami.

Entretantu, Governante ne’e afirma, governu mós planu sei harii tan fasilidade saíude iha fatin refere, nune’e, hakbesik atendementu ba vizitante sira bainhira hasoru buat ruma.