Ministru Mariano Assanami Sabino, dehan, Timor-Leste iha komponente tolu ne’ebé sai ai-rin ba ekonomia Timor-Leste hanesan, setór minarai no gás, setór agrikultura no setór turizmu.
“Hanesan ita hotu hatene, turizmu ne'e hanesan komponente tolu ne'ebé importante ba ai-rin ekonomia nian. Ida mak fundu minarai ne'e komponente ida ne’ebé agora dadaun lidera, tanba ita komesa ona produz mina, ita iha fundu minarai ne'ebé mak agora ita utiliza, Setór ida seluk mak agrikultura peskas no florestas. Tan ne'e, iha IX Governu komesa promove ona ekonomia azúl tanba Timor nia Tasi ne'e luan dala tolu Husi rai maran no ida seluk mak turizmu ne'e rasik,” dehan Vise-Primeiru Ministru ba Jornalista sira Kuarta foin lalais, (16/10/24).
Governante ne’e hatutan, setór turizmu mós iha komponente sira hanesan turizmu ekologis, turismu tasi, turizmu relijiaun, turizmu istória no turizmu kuliñaria.
Maibé husi setór turizmu hirak ne’e, presiza hadi’a nia infrastrutura sira liliu Estrada, eletrisidade, bee moos no kria fasilidade saúde ne’ebé diak.
“Turismu hola parte iha istoria ne'ebé ita iha no ita mós iha turismu kulinaria, ne'ebé ita presiza promove ida ne'e, ne’e ai-rin tolu ne'ebé tau ka marka iha ita nia planu estratejiku, ita seida’uk dezenvolve di'ak ida ne'e," katak nia.
Vise Primeiru Ministru daruak afirma, setór tolu ne’ebé seida’uk dezenvolve ho di'ak, IX governu konstituisional marka ona planu estratejiku atu hadí’a.
Iha fatin hanesan, Lia Na’in, Zacarias Mendonça hatete, fatin turizmu la’os de’it iha Rabilau, maibé sei fatin barak ne’ebé governu presiza dezenvole tan.
Nia dehan, se bá oin mak prezidente republika iha hanoin atu dezenvolve tan fatin furak sira seluk ne’e diak liu tan atu lebele hanoin de’it ba mina ho gas ne’ebé iha, maibé husi turizmu mós bele defende ona futuru Timor nia liliu ba timoroan sira nia futuru.
“Na’i Prezidente ba oin mak sei hanoin katak atu promove tan fatin sira seluk ne’e, fatin ne’ebé furak no furak liu tan ne’e sei iha, atu bele haburas ita nia rai lalika ho buat seluk, labele hanoin de’it ba mina maibé ho turizmu kultural, ita bele defende ita nia rai ne’e ba futuru, ita nia oan ba jerasaun bele moris di’ak liu tan hanesan loron ne’ebé ita hasoru dadauk ne’e,” Lia Na’in Hakotu.
