Xefe Governu to’o iha Parlamentu Nasionál Senayan, simu hosi Prezidente Repúblika Indonézia eleitu, Prabowo Subianto, no diretamente bá iha fatin ne’ebé prepara hosi komisaun organizadora.
Prabowo Subianto agradese bá bainaka espesiál sira no hasé Prezidente Repúblika ho Primeiru-Ministru sira hosi nasaun oioin inklui Primeiru-Ministru Timor-Leste, Kay Rala Xanana Gusmão ne’ebé partisipa iha serimónia importante ne’e.
Liu hosi diskursu dahuluk, Prabowo Subianto kompromete sei hametin liu tán relasaun di’ak ho nasaun hotu-hotu liu-liu nasaun viziñu sira.
“Liga ho asuntu internasional, Indonezia hili dalan livre, ita lakohi tuir paktu milita ruma, tan iha hakarak hili dalan amizade ho nasaun hotu-hotu,” Prezidente Repúblika Indonézia bá dala-ualu ne’e afirma liu husi komunikadu ne’ebé Online INDEPENDENTE asesu, kuarta (20/10/24).
Prabowo mós promete atu durante iha nia ukun hamutuk ho estrutura halakon tiha grupuizmu, familiarizmu no partidarizmu.
Iha okaziaun ne’e Primeiru-Ministru, Kay Rala Xanana Gusmão espresa sentimentu kontente tanba bele partisipa iha serimónia posse ne’ebé Prabowo rasik mak konvida.
“Kontente tanba bele partisipa hamutuk ho rai barak iha tomada de pose Prezidente Prabowo. Prezidente nia diskursu temi buat id aka[as tebestebes katak, hanesan Prezidente labele haree deit baa an, familia no grupo, maibé mai atu serviu. Hanoin di’ak tebtebes ida ne’ebé ha’u mós sempre ko’alia,”Xanana Gusmão sita diskursu Prabowo.
Primeiru-Ministru hatutan, Prabowo mós promete atu haree kona-bá problema hahán tanba sira la konsege rezolve problema hamlaha iha sira-nia rain.
“Nia ko’alia buat ne’ebé Indonezia agora enfrenta hela, la’ós de’it kona ba hahan maibé uma laiha,no laiha servisu. Nia promote katak sei esforsu atu redus tiha problema sira ne’ebé Indonezia enfrenta. Kona ba relasaun internasional nia tem liu mak Indonezia tomak apoia Estadu Palestina ne’ebé ita mós apoia maibé nia diskursu orienta liu ba sosiedade no povu atu moris iha dame, labele hirus malu, hodi hothotu bele hanoin ba dezenvolvimentu nasaun,” PM Xanana hateten.
Xefe Governu ne’e mós observa katak, aktu hosi Prezidente Prabowo ne’ebé presta omenajen bá líder nasaun nian, hanesan aktu ida ne’ebé di’ak tebtebes tanba nia hakarak unidade nasionál, hodi hakotu diferensa saida de’it maka iha, hosi grupu, partidu tenke tau uluk interese nasaun no povu nu’udár devér boot liu ida-idak nia hanoin.
Prabowo Husu Atu Vizita Timor-Leste
Iha okaziaun ne’e, Prezidente Repúblika Indonézia mós husu bá Primeiru-Ministru, Kay Rala Xanana Gusmão kona-bá vizita Estadu mai Timor-Leste (TL).
“Nia mai komprimenta no husu atu bainhira mak nia bele ba Timor. Ha’u dehan, depois mak ita haree. Ne’ebé kapas tebtebes,”PM Xanana haktuir.
IX Governu Konstisionál define Timor-Leste polítika esterna ho prinsípiu ida-ne’ebé konsagra sentidu independénsia no soberania maka: “Ba Timor-Leste, Laiha Aliadu ka Inimigu, Hotu-hotu sei hamutuk no Amigus de’it”.
“Ida ne’e sai hanesan ita nia lema ne’ebé sei orienta TL iha Relasaun Esterna, iha konjuntura internasional ida ne’ebé dadaun ne’e difisil tebes,”Xanana subliña.
Iha serimónia posse ne’e nia rohan, Prezidente Prabowo Subianto ho Vise-Prezidente Repúblika, Gibran Rakabuming Raka komprimenta Primeiru-Ministru, Kay Rala Xanana Gusmão.
Akompaña Primeiru-Ministru Kay Rala Xanana Gusmão partisipa iha serimónia posse ne’e maka Ministru Negósiu Estranjeiru no Kooperasaun (MNEK), Bendito dos Santos Freitas.
