Rezultadu votu pezar ne’ebé Parlamentu Nasionál halo hodi fó sentimentu solidariedade ba vítima Sulawesi-Palu ne’e vota afavor 48 kontra no abstensaun laiha.

Prezidente PN, Arão Nóe de Jesus hatete, akontesimentu dezastre naturais ne’ebé mosu iha Palu halakon ona ema nia vida no estraga povu nia sasán barak.

Indonézia hanesan nasaun viziñu ne’ebé iha relasaun bilaterál di'ak ho Estadu Timor, tanba ne’e sofrimentu povu iha ne'ebá sente Estadu iha ne’e mós sente.

“Parlamentu Nasionál Timor-Leste sei envia karta ida ba embaixada Indonézia hodi fó votu solidariedade ba povu afetadu sira iha provínsia Sulawesi”, dehan nia, iha Uma Fukun PN, horisehik.

Hanesan nasaun viziñu iha sentimentu solidariedade ba malu, tanba ne’e sei husu ba Governu atu liu husi Konsellu Ministru atu foti desizaun ruma hodi fó apoiu umanitáriu liu husi finanseira atu ajuda sira ne’ebé presiza.

Iha fatin hanesan, Deputada Bankada FRETILIN, Lídia Norberta hateten, iha akontesimentu kuandu akontese timoroan na’in haat (4) mós hela iha ne'ebá hodi hala’o estudu maibé sira di'ak hela.

Husi sira na'in haat ne’e na’in ida agora fila ona mai Timor, sira na’in tolu sei iha ne'ebá. Tanba ne’e, husu ba Governu atu kontinua asegura sira iha fatin ne’ebé seguru.

Alende ne’e, Sekretáriu Estadu Komunikasaun Sosiál (SEKomS), Juvinal Mericio Akara hateten, akontesimentu dezastre naturais iha Indonézia ne’e governu Timor-Leste sente, tanba ne’e liu husi PN lori Estadu nia naran hodi fó votu pezar ba vítima terramotu.

Nune’e, atu fó apoiu umanitáriu ruma ba iha ne'ebá Governu sei deside liu husi enkontru Konsellu Ministru nian.

Akontesimentu dezastre naturais terramotu akontese iha Palu-Indonézia, iha Sesta (28/9), tuir dadus presemináriu ema mate hamutuk 832. Posibilidade númeru ne’e sei aumenta tanba prosesu buka tuir vítima sei kontinua la’o nafatin.