“Aprovasaun ne’e ho votu a-favor 36, kontra 0 no abstensaun 0,” Online INDEPENDENTE sita iha komunikadu.
Ho nune’e, projetu lei protesaun ba labarik no joven iha perigu aprova ona iha final global. Nune’e komisaun F atu halo redasaun final iha tempu badak haruka fali mai meza hodi envia ba Prezidente Republika halo promulgasaun.
“Lei refere sei regula kona-ba definisaun tinan ba labarik sira oinsa ezerse nia direitu iha prosesu dezenvolvimentu nasionál inklui direitu sira seluk,”tenik komunikadu.
Iha projetu lei refere, iha artigu hamutuk 130 no kapitulu XI. Nune’e, iha kapitulu I koalia kona ba dispozisaun jeral, kapitulu II koalia kona ba intervensaun promosaun direitu sira no protesaun labarik no joven iha perigu no mós kapitulu III hatete, medida promosaun direitu no protesaun.
Aleinde, kapitulu IV koalia kona ba komunikasaun, kapitulu V kona ba intervensaun Ministeriu Publiku, kapitulu VI previstu dispozisaun prosesual jeral no kapitulu VII hatete kona ba prosedimentu urjensia.
Ho nune’e, kapitulu VIII koalia kona ba prosesu iha servisu protesaun labarik no foinsa’e no mós kapitulu IX koalia kona ba prosesu judisial promosaun no protesaun.
Enkuantu, molok ne’e iha loron 20 setembru 2021, PN aprova ona lei protesaun ba labarik no joven iha perigu nia laran iha faze jeneralidade ho votu a-favor 54, kontra 0 no abstensaun 1.
