Tuir komunikadu ne’ebé Online INDEPENDENTE asesu husi pajina MSSI, relata, objetivu husi peskiza ida ne’e hanesan estudu impaktu ida husi implementasaun programa hametin família ne’ebé hala’o ona iha Munisípiu Ermera no Vikeke.

Ne’eb’e programa ida ne’e realiza tanba MSSI servisu hamutuk ho parseiru UNICEF.

Hafoin públikasaun relatóriu peskiza, Diretór Nasionál Inkluzaun no Reinsersaun Komunitária Amandio Amaral Freitas hateten, programa hametin família hanesan programa ida importante atu kontinua hala’o no impaktu direta husi programa ida ne’e rasik mak oinsá iha mudansa atetudi família sira nian kona-ba tau matan ba labarik sira.

"Ita hakarak kontinua programa ida ne’e maibé ita presiza halo peskiza ida hodi hatene lolos formasaun sira ne’ebé ita halo ona ba família sira, nune’e ita bele hatene ninia mudansa ou impaktu ne’e to’o iha ne’ebé, liu-liu liga ba atetudi tau matan ba labarik sira,"dehan komunikadu ne’ebé Online ne’e sita.

Diretór ne’e haktuir, iha relatóriu ida ne’e mós iha rekomendasaun balun ne’ebé husu atu bele flow-up hodi nune’e ba futuru bele hadia hodi asegura nafatin direitu ba labarik sira iha Timor-Leste.

Nune’e mós, Xefe Protesaun Labarik-UNICEF, Domingos da Costa Sousa hateten, peskiza ida ne’e hanesan estudu ida kona-ba koñesimentu atetude no pratika husi inan aman ba iha labarik sira.

Programa ida ne’e implementa ona iha Munisípiu Ermera no Vikeke, ne’ebé hala’o iha suku hotu-hotu iha munisípiu refere. Ninia modalidade mak liu husi sesaun komunitária no teatru joventude sira, vizita uma kain no liu husi intervensaun média atu bele públika informasaun sira.

Husi relatóriu ne’e iha mudansa balun ne’ebé akontese hanesan koñesimentu inan aman sira nian kona-ba atetude liu-liu molok sira koñese programa ida ne’e.

"Sira sempre aprosima ho baku, hirus no sempre hasoru asaun violentu ba labarik sira, maibé depois sira partisipa programa ne’e sira iha hanoin katak iha meus positivu balun ne’ebé sira bele fó apoiu hodi halo labarik sira moris ho disiplina no la liu ho dalan violéntu," tenik nia

Entretantu, Koordenadór ba assuntu prevensaun no advokasia husi Instituisaun Alfela, Antonino Marques hateten, ho relatóriu ida ne’e bele ajuda ona sira atu eduka no fó formasaun di’ak ba moris iha família.

“Liu-liu oinsá bele fó edukasaun ne’ebé mak di’ak ba oan sira, nomós bele ajuda organizasoens sira seluk hanesan referénsia ida atu bele la’o tuir iha sira nia servisu no bele influénsia ba iha komunidade, liu-liu komunidade sira ne’ebé afeita ba problema.

Entretantu, relatóriu ida ne’e mós sai hanesan informasaun ida no tulun komunidade sira atu bele hasa’e sira ninia koñesimentu no atu kria moris harmonia iha família, kria situasaun ida ne’ebé moris ho paz no hakmatek.