Prezidente Komisaun F trata asuntu Saude, Seguansa Sosial no Igualdade Jeneru, Noe da Silva Ximenes, husu ba inan-aman sira atu labele haruka sira-nia oan fa’an sasan no halo servisu todan.

Iha Lei Protesaun Labarik no Joven iha Perigu, Noe hatete, labarik ne’ebé fa’an sasan iha dalan públiku tama kategoria risku.

“Ita, inan-aman, barak husik labarik sira, ne’ebé kuidadu kuandu lei ne’e hetan ona implementasaun,” dehan Noe iha Parlamentu Nasionál, Kuarta (08/02).

Deputadu ne’e rekomenda ba Ministériu Solidariedade Sosial no Inkluzaun ne’ebé sei implementa lei refere atu tenke implementa ho di’ak.

“Pontu de vista ami nian hanesan lejizlador katak lei ne’e di’ak,” dehan nia.

Kona-ba prosesu ba lei refere, nia hatete, PN aprova ona projetu Lei Protesaun Labarik no Joven iha Perigu iha final globál.

“Projetu lei protesaun ba labarik sira horseik (Tersa) aprova ona iha final global. Loloos ami halo aprovasaun redasaun final no lokraik ne’e aprezenta ba meza parlamentu nasionál hodi evia ba prezidente repúblika atu promulga, maibé tanba komisaun F iha kestaun barak ne’ebé sei trata liga ba asuntu saúde nian, entaun komisaun F tenke halo uluk servisu prioridade ne’ebé mak agora iha.”

“Asuntu projetu lei ne’e aban (ohin) ami foin halo elaborasaun finál depois parte lokraik haruka ba meza parlamentu nasionál atu envia ba Prezidente Repúblika atu promulga,” nia hateten.

Entretantu, tuir rezultadu peskiza husi Kombate Traballu Infantil no Inspesaun Jerál (CNCCTI-IG), ne’ebé anunsia iha 7 Juñu 2022 katak, labarik rihun 52 mak hala’o servisu.

Prezidente CNCCTI-IG, Aniceto Leto Soro hatete, bazeia ba peskiza ne’ebé CNCCTI-IG hala'o hahú husi tinan 2016 to'o 2022, identifika katak traballu infantil prejudika labarik sira-nia edukasaun, dezenvolvementu fíziku no intelektual.

"Ohin ami aprezenta ba Xefe Estadu kona-ba rezultadu servisu ne'ebé ami halo. Primeiru ami halo peskiza nasionál kualitativu no kuantitativu ne’ebé ami halo tiha ona iha 2016 to’o 2022 ne'ebé eziste traballu infantil iha Timor Leste purvolta rihun 52 ne'ebé konsidera servisu ne'ebé aat, prejudika ba sira-nia edukasaun, dezenvolvementu fíziku no intelektuál, ne’ebé ita presiza tau iha asaun imediatu, medida iha ita-nia planu asaun nasionál ba kontra traballu infantil hodi nune’e bele elimina ka solusiona alternativa saida mak ita bele fó," dehan Aniceto hafoin enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Barru-Pite, iha tinan 2022 liu ba.

Enkuantu, tuir dadus husi Komisaun Nasionál Direitu Labarik, labarik sira ne'ebé mak fa'an sasán iha dalan hamutuk 200 resin.