Aprovasaun ba alterasaun Lei númeru 6/VI (1ª), alterasaun daruak ba Lei númeru 8/2009, 15 Jullu, ho votus a favor 37, abstensaun no kontra mamuk (0) ne’e la ho prezensa deputadu husi bankada Fretilin no PLP.

Molok tama iha votasaun, Ministru Justisa, Sergio Hornai esplika, proposta alterasaun Lei KAK husi Governu ne’e atu oinsá mak fó em faze ba iha eleisaun Komisáriu KAK iha Parlamentu Nasionál, liu-liu proposta ne'ebé mai daudauk husi Governu.

Artigu 7, númeru 1 ne'ebé Governu halo proposta ne’e atu bele sai hanesan konsiderasaun mak: Komisariu hili husi Parlamentu Nasionál ho proposta husi governu ho maioria absoluta deputadu no simu posse husi Prezidente Parlamentu Nasionál (O Comisario e designado pelo Parlamento Nasional sua proposta do Governo pelo maiória absoluta pelo deputado e toma posse para Prezidente da Parlamento Nasionál).

Ho artigu ne’e, nia dehan, bele fó fatin ba PN atu ezerse ninian direitu hodi bele halo eleisaun ba Komisariu KAK.

"Tanba la nesesáriu ona atu lori 3/4 deputadu sira nian prezensa iha Parlamentu Nasionál. Maibé ita bele uza de'it medida maiória absoluta hodi nune'e bele halo eleisaun ba iha kargu titular Komisaun Anti Korrupsaun ninian," dehan Ministru ne’e iha PN, Segunda (22/04).

Governu, nia hatutan, halo mós empoderasaun ba artigu 11, liu-liu iha númeru 2 alinea ‘g’ ne'ebé iha relasionamentu bainhira iha Komisáriu ida ne'ebé eleze karik iha interupsaun ruma ka iha ezonerasaun ruma, bele iha posibilidade uza mós hanesan iha artigu 7 atu labele halo difikuldade ba ninian ezonerasaun bainhira iha enkumprimentu ruma ho razaun fiziku.

"Tanba ne'e ami mai ho proposta ne'e par atu fó kontinuadade ba servisu sira ne'e, liu-liu iha orgaun polísia investigasaun criminal, bainhira nia mandatu remata maibé seidauk eleze ka hili kandidatu ba komisáriu Komisaun Anti Korrupsaun ba iha kargu titular mak Komisáriu ida ne'e bele kaer nafatin nia posizaun, to'o iha eleisaun novo kandidatura Komisaun Anti Korupsaun ninian," eis Komisariu KAK ne’e esplika.

Deputada bankada CNRT, Maria Bareto konsidera, Governu iha razaun forte tebes atu halo alterasaun nune'e funsionamentu instituisaun KAK bele kontinua, liu-liu ba Komisáriu hodi halao ninia servisu tuir lei no orden.

Entretantu, hafoin aprova, Prezidente PN, Maria Fernanda Lay, husu ba Komisaun A trata asuntu Justisa atu halo redasaun final, nune'e bainhira Prezidente Republika, José Ramos Horta, fila husi Portugal sei submete kedas ba promulgasaun.

Molok ne’e, Prezidente Repúblika, José Ramos Horta deklara bainhira Parlamentu Nasionál haruka alterasaun Lei Komisaun Anti Korrupsaun, nia sei promulga kedan.

Xefe Estadu dehan, nia parte konkorda porsentu 100 ho alterasaun lei KAK tanba hili Komisáriu KAK la'ós eleisaun ba Prezidente Repúblika.

Iha rai balun, hanesan mós Indonezia, iha tempu liu ba, Prezidente Repúblika eleitu husi Parlamentu Nasionál ho prezensa 2/3 deputadu.

"Agora atu hili Komisáriu KAK ida sei presiza loos to'o 2/3, la'e, demokrásia no polítika la signifika unanimidade, la signifika konsensu, maibé iha de'it maiória, ne'eduni ha'u konkorda ho alterasaun lei KAK ba maiória simples atu hili KAK,” deklara Prezidente Repúblika, José Ramos Horta, ba jornalista sira hafoin abertura treinamentu ba sosializasaun kona-ba edukasaun multi-lingua iha INFORDEPE, Balide, Kinta (18/04).

Tan ne’e, Horta dehan, bainhira PN aprova no haruka mai alterasaun ba Lei KAK ne’e, nia sei promulga kedan.

“Alterasaun lei KAK ne'e to'o tuku 10 dader, iha tuku 11 ha'u promulga kedas," dehan Horta.