Iha 22 Abril, horseik, Konsellu Ministru halo reuniaun estra-ordinariu hodi koalia kona-ba eviksaun ba populasaun sira-nia uma iha kapital Dili.

Vise Ministru Asuntu Parlamentár, Aderito Hugo da Costa informa, iha reuniaun KM ne’ebé lidera husi Vise Primeiru Ministru Asuntu Sosiais, Mariano Assanami Sabino, hodi koordena ho liña Ministériais relevante sira hodi halo avaliasaun ba pontu situasaun serbisu sira relative ho kestaun sosiál sira ne'ebé ke enfrenta no halo kordenasaun par reforsa di'ak liu tan servisu sira ne'ebé ein progresu, nune'e bele fó resposta bá espetativa públiku nian sobre serbisu organizadu ne'ebé koordena direitamenete husi Governu sentrál.

Iha reuniaun ne’e, nia hatutan, koalia mós kona-ba asuntu eviksaun ne'ebé Implenta husi SEATOU, Ministériu Administraun Estatal, Ministériu Justisa no Sekretáriu Estadu Terras Propriedade, no envolvementu ministériu sira seluk.

Nia hatutan, halo mós avaliasaun ba opiniaun husi públiku, sosiedade sivil no akademiku sira ne'ebé mai ho interpretasaun oioin.

Reuniaun kordenasaun ne'e atu rekoila informasaun husi liña ministerial hotu ne’ebé envolve iha intervensaun ne'e kona-ba kobertura legal sira, kompetensia no obrigasaun liña ministerial sira nian liga ho prográma sira notifikasaun ba komunidade afeitadu sira.

"Halo klasifikasaun fali ba pontu situasaun sira ne'e par depois bele fó resposta ba ita-nia sosiedade katak saida mak ita-nia governu halo, saida mak liñas ministériais halo bazeia ba regras normas ne'ebé ke vigóra iha ita-nia rai, inklui investimentu polísia militar husi forsa ninia ba apoiu atividades intervensaun sira iha karákter nasaun iha hela estabilidade seguransa rai laran," deklara Aderito hafoin reuniaun KM, iha palasiu governu, Segunda (22/04).

KM halo avaliasaun tanba, nia dehan, opiniaun públiku mós konsentra hotu tansa mak envolve militar.

Tuir Ministru Defeza, nia hatutan, regras iha situasaun estra-ordináriu seguransa nian ho situasaun normál intermus implentasaun programa ruma ne'ebé ke nesesita prezensa militár nian ho sirkunstanaia bele la viola regras ruma, tanba iha situasaun balun polísia bele husu apoiu ba forsa armada.

“Ida ne'e hotu mak halo koordenasaun, ne'e envolvementu husi Ministériu Justisa, Ministériu Saúde, Ministériu Solidariedade Sosiál, par depois serbisu ekipa ein integradu par nune'e fó resposta saida mak preokupasaun públiku nian sobre kestaun Direitus Humanus no buat seluk-seluk tan, problema sosiál, Ministériu ne'e serbisu integradu, planeadu, la'os buat ida halo pur halo.”

"Eviksaun la'o nafatin, imi hotu hatene pontu-pontu sira ba eviksaun ne'ebé ke Implenta ne'e la'os buat foun, ne'e desde governu anterior sira, no governu ida ne'e mai mezmu ke iha ona notifikasaun governu anterior sira ba entidade sira ne'e, ba komunidade sira áfeitadu ne'e, governu dasia mós liu husi Ministériu kompetente halo notifikasaun kedas iha fulan Setembru tinan kotuk, par depois implenta ba ezekusaun ne'e agora.”

“Primeiravez governu ida ne'e reforsa tan komprimisiu Governu sira anterior ne'ebé ke tanba espasu sira ne'e planeadu tiha ona ba espasu públiku Estadu nian. Uluk notifika, notifika de'it, hafoin ida ne'e primeiravez notifika tan no ezekuta. Tanba se lae dada de'it hanesan ne'e la rezolve,” dehan Hugo.

Halo despezu administrativu laos eviksaun

Sekretáriu Estadu Komunikasaun Sosial (SEKomS), Expedito Loro Dias Ximenes hatete, governu la'os halo eviksaun maibé asaun ne'ebé Governu liu husi SEATOU halo ne'e despezu administrativu.

"Ha'u reforsa tan, durante ne'e ema bolu dehan prográma ida ne'e eviksaun, purtantu loloos ne'e la'os eviksaun, loloos ne'e despezu administrativu tanba kuandu eviksaun ne'e tenkeser desizaun Tribunal," dehan Expedito.

Tuir regra despezu administrativu, nia dehan, fó notifikasaun loron 30, bainhira la kumpre, fó tan oportunidade loron 10, sé loron 10 mós la kumpre mak estadu bele atua.

Tan ne’e, nia afirma, durante ne'e Governu dasia liu husi SEATOU halo tuir regras ida ne'e.