Lista ne’e atu bele halo identifikasaun ba track record estrutura governu foun sira ne’ebé envolve iha kazu krime korrupsaun koluzaun no nepotizmu (KKN) iha sira-nia mandatu balun.
“Sé mak komete ona kazu ruma la merese sai membru governu, tanba povu nia hakarak ne’e governasaun ne’e tenke moos. Governasaun ne’ebé efetivu atu nune’e bele responde povu nia preokupasaun”, dehan Diretór Ezekutivu Luta Hamutuk, José Alves, iha nia knaar fatin, Faról-Dili, horisehik.
Nia dehan, karik partidu ida idak hakarak defende nia-ema, maski komete ona kazu ruma maibé defende no husik nafatin atu ba tuur iha governu maka susar atu hadi'a povu nia moris.
VIII Governu Labele Bokur Liu
Sujestaun Sosiedade Sivíl nian ba formasaun VIII governu ne’e atu labele bokur liu, tanba TL iha limitasaun, liu-liu rekursu ekonomia ne’ebé seidauk sufisiente.
“Formasaun VIII Governu sei iha kadeira 42. Ha’u hanoin estrutura ne’e ba ami boot liu no la reflete povu iha baze tanba rai ne’e ki'ik no nia povu natoon de'it”, dehan José.
Nia hatutan, presiza halo redusaun tanba governasaun ne’ebé bokur maka sei gasta osan ne’ebé boot.
“Balun utiliza partidu polítiku hanesan kanál atu hetan oportunidade ba kargu, no la’ós interese atu hadi'a povu nia moris. Tanba ne’e ami rejeita totál no la satisfás se-kuandu governu ida ne’e sai boot”, dehan nia.
Entretantu, Diretór Ezekutivu Asosiasaun HAK, Manuel Monteiro hateten, VIII governu la'ós problema ki'ik ka boot, maibé problema ne’e iha vontade halo servisu ka lae. Bainhira estrutura ne’e ki'ik mós presiza investimentu boot tanba osan ne’e la la’o mesak, presiza ema maka halo.
“Bainhira nia estrutura ne’e boot maibé la halo servisu ba to’o iha nivél suku ninia maka povu nafatin la sente katak prezensa governu nian ne’e iha, ne’ebé mai ami la'ós kestaun ne’e boot ka ki'ik,” hateten nia.
Kestaun maka oinsá atu hala’o duni sira nia kna’ar ne’e ho efetivu ka lae no tau duni interese povu nian ne’e aas liu interese partidária, interese grupu ninia ka lae. Tanba interese povu ninia ne’e labele sai de’it slogan de’it iha tempu kampaíña.
