Segundu Komandante Polisia Munisípiu Dili, superintendente asistente Euclides Belo hateten, sistema alerta dois ne’e mantein nafatin durante tinan rua ona mantein nafatin.

“Ami to’o agora seidauk muda sistema alerta dois ne’e para atu garante seguransa. Ami halo ona briefing ba komandante eskuadra sira hodi prepara ona planu operasaun ba plenária dahuluk iha PN”, dehan nia, iha edifísiu komandu Polisia, Kaikoli, horisehik.

Tuir nia, alerta dois ne’e hahú ona Segunda 11 to’o 13 Juñu atu garante seguransa totál ba kualkér atividade públiku sira nian ne'ebé sei utiliza espasu PN nian, inklui dalan públiku iha UNTL oin.

“Ami sei halo pasa revista para atu identifika membru órgaun lejizlatura foun ne'ebé sei asume knaar iha PN”, tenik nia.

Orientasaun ne'ebé hatún ona, katak iha loron 13 Juñu estrada diresaun PN nian sei blokeiu para atu fó seguransa di'ak liu tan ba órgaun lejizlatura foun sira atu hala’o sira nia knaar.

Entretantu, membru efetivu ne'ebé sei destaka iha seguransa PN nian hamutuk 250 sei garante seguransa no sei hetan apoiu husi Unidade Espesiál Polisia (UEP), Unidade Polisia Tránzitu rodaviaria inklui mós Polisia Militár.