Iha eleisaun ne’e, AMP mak avansa nia-kandidatura únika, nune’e husi opozisaun hanesan partidu FRETILIN, PD no FDD deside la kandidata ema ruma hodi kompete ba eleisaun Prezidente PN.

Maski kandidatura únika maibé eleisaun kontinua la’o tu’ir prosesu demokrasia, iha eleisaun ne’e vota afavór hamutuk 36, kontra 29, no abstensaun 0. Tanba ne’e, deputadu Arão Noe ofisialmente eleitu sai Prezidente PN.

Prezidente eleitu, Arão Noe, kompromete iha V Lejizlatura PN ne’e sei fó prioridade hodi halo diskusaun no aprova ba programa no Orsamentu Jerál Estadu (OJE) VIII Governu Konstitusionál nian.

“Fó uluk prioridade ba diskusaun programa no orsamentu atu bele rezolve impase polítika hodi funsiona di'ak liután mákina Estadu ne’ebé iha tinan 1 nia laran ladún la’o di’ak”, dehan nia, iha diskursu, iha Uma Fukun PN, horisehik.

Alende ne’e, Prezidente PN eleitu mós kompromete sei fó importánsia ba Lei sira importante ne’ebé to’o oras ne’e seidauk bele aprova.

Arão agradese ba lideransa AMP ne’ebé depozita ona konfiansa hodi sai Prezidente PN hodi lidera órgaun soberania daruak ne’e iha tinan lima nia laran.

Hanesan Prezidente PN, atu dirije de’it meza maibé laiha plenus poderes, so iha ne’e deputadu sira. Tanba ohin eleitu ona ba Prezidente PN kompromete katak sei dirije meza tuir konstituisaun RDTL no rejimentu PN nian ne’ebé estabelese ona.

Arão dehan iha tinan ida nia laran nasaun ne’e enfrenta impase polítika iha PN, durante ne’e deputadu sira la entende malu. Tanba ne’e, husu ba reprezentante povu tomak atu haluha pasadu hodi servisu hamutuk atu bele lori dezenvolvimentu ba povu no nasaun ne’e.