Tanba ne’e, nia parte hamutuk ho ekipa MOP ho Autoridade Lokál Ataúro atu haree progresu servisu iha Ataúro tomak.
“Ha'u mai ho ekipa ida ho Prezidente Autoridade iha ne'e halo vizita ida, atu mai hare progresu servisu iha Ataúro tomak, la'os deit mai hare estrada, mai hare mós kona-bá bee-moos ne'ebé falta teb-tebes iha ne'e no eletrisidade tanba iha ne'e potensia barak,” Dehan Ministru Samuel ba Jornalista sira, iha Suku Beloi, Sábadu (25/04).
Ministru Obras Publika haktuir, nia parte hare Ataúro kada loron vizitante sira sempre ba vizita Ataúro, ne'e signifika ekonómia iha rai-laran sirkulasaun hahú la'o di'ak, tanba ne'e mak estrada ne'e importante tebes atu fasilita movimentu ema no movimentu ekonómia.
Governante ne'e reforsa, nia vizita la'os de'it atu haree Estrada, maibé atu haree mos fatin sira iha tasi-ibun ne'ebé sai potensia ba negosiu, atu komunidade sira labele konstrui uma bá. Maibé fó de'it ba ema ne'ebé atu halo komérsiu hanesan loke restaurante no Ótel.
Iha biban hanesan, Diretór Kompaña Tinolina Unipesoal Lda, Agustino Gomes hatete, projetu rehabilitasaun ne'e, la'os de'it ba dalan protokolu, maibé ba mos estrada sira iha Bairo.
“Estrada ne'e hahú ona iha fulan janeiru no foin tau alkatraun, maibé dadaun ne'e problema ne'ebé ami hasoru mak alkatraun la iha, tanba krize iha mediu oriente," Afirma Na'in ba kompaña.
Nia mos agradese ba komunidade sira, tanba kooperasaun tebes, traballadór sira ne'ebé halo hela servisu iha terrenu.
Iha fatin hanesan, Reprezentante Komunidade Ataúro, Leo komakose hatete, hahú husi tempu ukun to'o agora la sente estrada nia di'ak, maibé ho governu ida ne'e konsege realiza sira nia politika ho di'ak hodi hadi’a estrada urbana sira.
“Ami sente kontente tebes tanba, tempu barak desde hahu ukun an ami nunka senti estrada diak hanesan agradese tanba iha Nonu Governu konstituisionál konsege realiza tuir promesa politika nian ohin akontese duni iha Ataúro,” Tenik nia.
Reprezentante komunidade Ataúro ne'e husu ba governu atu estrada ida ne'e halo hodi haleu Ataúro tomak tama to’o suku no aldeia, se estrada ne'e halo deit iha dalan protokolu deit la dun diak.
Tanba komunidade maioria hela liu iha foho leten no Tasi sorin, atu nune'e sira mos sente saida mak komunidade sira iha Ataúro vila sente.
Enkuantu, reabilitasaun estrada urbana iha Ataúro hahu husi Atauro vila to'o iha suku Biqueli hamutuk 17Km ne'ebé dadaun atinji ona 70% no montante orsamentu hamutuk millaun $7.
