“Tansa CNRT la ónestu de’it ba povu Maubere, katak CNRT lakohi ona apoiu VIII Governu nia OJE no selseluk, no hakarak forma fali IX Governu ne’ebé (tuir lia anin) sei lidera rasik husi Prezidente CNRT ka pessoa seluk,”dehan PLP liu husi nia funpage facebook ne’ebé Online INDEPENDENTE asesu.

PLP hahú foti asaun relasiona rezolusaun CNRT reafirma pozisaun mantein iha Aliansa Maioria Parlamentar (AMP), maski PLP deklara ona CNRT rasik mak oho tiha AMP ne’ebé la apoiu Orsamentu Jerál Estadu tinan 2020.

Bazeia ba akordu AMP 2018, PLP kestiona legalidade, prosesu sira ne’ebé oras ne’e CNRT selebra hela ho partidu seluk forma IX Governu. Ne’e viola totalmente Konstituisaun RDTL ho lei sira seluk kona-ba partidu politiku ho Parlamentu Nasional nian.

PLP, nota katak ho hahalok‚ deputadu CNRT ne’ebé la apoiu OJE 2020, ne’e hanesan razaun no provas hatudu momos katak CNRT laiha ona konsensia atu kontinua forma aliansa ho PLP iha PN.

Tanba ne’e, PM VIII Governo (Prezidente PLP) hatoo tiha ona karta demisaun ba Presidente Repúblika Fransisco Guterres Lú Olo, iha tempu ne’ebé AMP la ejisti ona.

Tuir PLP katak, AMP 2018, la eziste ona tanba deputadu CNRT rasik viola akordu sira AMP ne’ebé selebra iha tinan 2018 no aktá reuniaun iha hotel Golgota.

“Serake ida ne’e laos Xantajen Politika dala ida tan hodi kontra CNRT nia konsensia rasik, ou tan de’it atu kumpri Prezidente Repúblika nia mensajen bazeia ba rezultadu reuniaun meja redonda (meja kabuar), ne’ebé Prezidente CNRT lakohi partisipa iha reuiaun lidere sira iha altura neba”.

Molok ne’e, Presidente partidu CNRT, Xanana Gusmão iha grande intrevista GMN, hatete katak nia mós prontu dehan AMP mate duni ona karik PM Taur Matan Ruak rasik deklara AMP mate tiha ona.

Entretantu iha fatin seluk, Sekretáriu Jerál partidu CNRT, Fransisco Kalbuadi Lay deklara katak azisténsia AMP liu husi konferénsia, tanba ne’e atu hamate mós tenki fila fali ba konferénsia mak deside.