Diretór klinika HNGV Flacio Brandão informa, iha pasiente ida ne'ebé baixa iha sala ICU ospital nasionál tanba deskonfia hetan virus corona.

Nia dehan, mediku sira hasai ona sampel no haruka ona ba Australia hodi halo teste.

"Hain de'it nia rezultadu. (Pasiente) ida ne’e iha ICU maibé izola nia, tau ventilasi ne’ebé anin la sai," dehan nia iha HNGV, Sesta (06/03).

Entretantu, maske kazu virus Corona kontinua sai ameasa boot ba nasaun sira iha mundu, nune'e nasaun barak mak preokupa atu harii fatin ba tratamentu virus corona nian, maibé iha Timor Leste fatin izolementu ba suspeitu virus corona ne'ebé molok ne'e estabele iha Hospital Nasionál Guido Valadares (HNGV) daudauk ne'e laiha ona.

Bainhira virus corona hahú mosu iha Xina, Ministériu Saúde Timor Leste estabelese fatin izolamentu ida iha HNGV. Maibé, bainhira virus ne'e hahú sirkula iha mundu, HNGV mós taka fatin izolamentu refere.

Diretór klinika HNGV Falvio Brandão hatete, fatin ne’ebé molok ne'e prepara ba fatin izolamentu hanesan urijensia de'it.

Maibé, nia hatutan, HNGV muda tiha fatin izolamentu ne'e sai fatin baixa tanba pasiente barak demais no fatin la to'o atu halo tratamentu.

Ba fatin izolamentu, nia hatete, MS planu atu harii fatin izolamentu iha Formoza.

“Fatin ne’e ita iha extra bed tanba ne’e kuandu iha pasiente over lowded haruka mai baixa iha ne’e,” dehan nia.