Peregrinus Josefa Lisboa Soares (64), sente kontente vizita Sua Santidade Papa Francisco.

“Ha'u senti kontente tebes, mesmu ha'u mai husi foho, ha'u hela iha foho dok husi sidade Ataúro. Maibé ha'u senti katak, Amu Papa mai lori naroman no lori dame hamutuk ho ita. Ha'u agradese mai hodi simu naroman husi Papa Francisco,”  Haktuir Sarani Josefa, iha Pelican Paradise, Tibar, Domingu (08/09).

Sarani né'e haktuir katak, sira konsentra hamutuk iha fatin Pelican paradise hahú kedas iha loron sesta ne'e, maske durante viajen  ho lalaron tasi boot.

"Ami mai horiseik tasi bo'ot, ema barak mak muta, sa'e ro la hatene no kareta mos la hatene, maibé senti orgullu tebes, atu simu ita nia aman mai Timor-leste bele lori naroman no dame hodi hamutuk sai ema ida de'it,” Nia haktuir.

Maibé, husu bá sarani hotu husi Ataúro atu partisipa hotu aban, hodi simu vizita Papa Francisco,  tanba vizita ne'e hanesan esperansa naroman ni’an.

“Amu Papa tun mai Timor-Leste lori bensaun bá ita hotu, entaun ha'u sai iha foho Makadadi, ho hananu katak  naroman to'o ona, ita husi foho bá hamutuk ho sira husi suku Beloi, Maumeta, Bikeli hodi bá simu ita nia Amu Papa iha Tasi-tolu,” Nia relata.

Kona-ba fatin no fasilidade, nia informa, atendimentu sira-ne'e oferese husi Governu no Igreja di'ak tebes.

“Ami senti atendimentu diak tebes, sira atende hahan, bee-mos parte saude, no seluk tan diak tebes. Tan ne'e ami sarani sira senti haksolok,” Nia afirma.

Iha fatin hanesan, Peregriñus, Ariste Soares Perreira reforsa, agradese ba komisaun organizadora hetan oportunidade mai simu Papa Francisco.

“Hanesan foinsa'e agradese no kontente tebes, tanba bele iha oportunidade partisipa direita iha Sua Santidade Francisco ni’an,” Nia Espresa.

Nia dehan, fatin ne'ebe Governu prepara ba sarani husi Ataúro konsentra dadauk ne’e hahú kedas husi Sexta ne'e fatin ne'ebe seguru, di’ak no dignu tebes, hakmatek loos.

Nia ho esperansa katak vizita Amu Papa ne'e, bele hamenus ka hapara kedas Joven sira ne'ebe tuda malu no problema sira sempre akontese iha rai-laran.

“Espera katak mai ho milagre Ema hotu nia kakutak hanesan ami foinsa'e ne'e, hodi bele hanoin ida de'it katak ita ema hanesan de'it,” Nia espernsa.