Membru governu pendente na'in sia (9), na'in 7 husi CNRT no na'in 2 husi KHUNTO, ne'ebé la hetan pose husi Prezidente Repúblika Francisco Guterres Lu Olo sai nu'udar "huun" husi problema ne'ebé governu AMP hasoru.

Partidu CNRT ne'ebé ninia ema barak mak tama iha lista pendente sempre ezije atu PM Taur rezolve, maibé to'o ikus la konsege no CNRT deside hodi la vota a favor ba proposta OJE 2020.

Membru governu pendente ne'e bele sai mós ameasa ba governu foun bainhira CNRT kontinua aprezenta no PR Lu Olo mós nafatin la fó pose.

Ba kestaun ida ne'e, Sekretariu Jeral Partidu Demokratiku (PD), António da Conceiҫão ‘Kalohan’ hatete,  lista membru governu pendente la'os kestaun atu koalia tanba governu ne'ebé atu mai ne'e governu dasia la'os governu daualu.

“Ha'u hanoin situasun ida ne’e muda husi oitavo governu ba nono governu. Iha oitavo governu iha Primeiru Ministru ne’ebé mak lidera governu no iha nono governu sertamente iha Primeiru Ministru seluk,” dehan Kalohan iha ninia rezidensia, Tuana-laran, Dili, Sesta (21/02).

Tuir Kalohan, estratejia Primeiru Ministru ida ho Primeiru Ministru seluk konserteza sei la hanesan.

“Iha oitavu governu ema na'in sia (9) ne’ebé pendente ida ne’e la signifika katak konsiderasaun ida ne’e bele influensia nafatin situasaun ida ne’ebé mak ita hasoru ohin loron, tenke salva situasaun povu no nasaun nian,” dehan nia.

Iha fatin ketak, Eis Prezidente Repúblika José Ramos Horta hatete, seidauk to’o tempu atu koligasaun foun haree lista membru governu.

“Ha'u hanoin sira sei estuda didi'ak (haruka) ba prezidente repúblika, ha'u hatene prezidente repúblika mós sei sukat didi'ak, tenke hamutuk respeitu ba prezidente repúblika,” dehan nia.

Laureadu Nobel da Pas ne'e fiar nafatin Xanana sei halo diálogu ho PR Lu Olo no sei iha konsensus ida ba dalan ne’ebé di'ak liu.