Tuir lei eleitorál ne’ebé revé iha 2016 liubá, partidu polítiku ne’ebé atu tama ba Parlamentu Nasionál tenke hetan votu 4% husi totál votu válidu. Tuir kontajen matemátika karik (770.000 X 4 : 100 = 30.800). Signifika katak, kada partidu ida atu tama ba Parlamentu Nasionál tenke hetan votu 30.800, maibé númeru ne’e bele muda bazeia ba votu válidu.

Haree husi taxa votante populasaun ne’ebé iha direitu vota ki’ik, posibilidade ba partidu polítiku sira atu tama ba Parlamentu Nasionál mihis daudaun ona.

Ne’e duni, predisaun ba períodu ne’e, iha partidu haat mak hetan posibilidade ‘borus’ ba Uma Fukun Parlamentu Nasionál.

Tuir perspetiva premiadu Nobel da Pás, José Manuel Ramos Horta, iha eleisaun lejizlatura períodu ne’e partidu haat mak sei hetan votu barak hanesan partidu FRETILIN, CNRT, PD no PLP.

Partidu sira ne’e iha posibilidade tanba haree mós ba partidu sira nian personalidade ne’ebé makaas.

“Sé mak manan? Partidu boot FRETILIN, CNRT no PD. Ita bele hateten partidu foun mós ninia personalidade boot eis-Prezidente Repúblika, Taur Matan Ruak. Ita hanoin partidu sira ne’e mak sei ra'ut votu lubuk ida”, dehan nia, hafoin hasoru malu ho Prezidente Repúblika, Francisco Guterres ‘Lú-Olo’, iha Palasiu Prezidensiál Ai-Tarak Laran, Sesta (23/6).

Husi partidu haat ne’e ne’e sé mak sei hetan votu maioria, eis-Prezidente Repúblika seidauk bele siik, tanba partidu sira ne’e hotu-hotu iha poténsia.

“Se mak atu ra'ut maka’as liu ita la hatene, maibé importante liu mak eleisaun liu tiha”, dehan nia.

Nia hatutan, hanesan hatuur ona iha Konstituisaun RDTL, Prezidente Repúblika sei bolu partidu ne'ebé manan atu forma Governu.

Horta husu atu forma Governu foun tenke hili ema ne'ebé partidu mais votadu aprezenta no hatudu ninia sentidu matenek.

Tuir nia, importante liu halibur timoroan hotu-hotu ne'ebé iha, la'ós sira ne'ebé manan eleisaun, mais ne'ebé iha kualidade, ema independente ruma, husi sosiedade sivíl, hodi kontribui tinan lima mai governasaun sei sai di'ak liután.