DILI: Ministru Justisa, Sergio Hornai deklara, la adminte pesoal autoridade investigador Polísia Sientífika Investigasaun Kriminál (PSIK) lori pistola ameasa joven na’in tolu iha area Delta.

Ministru dehan, nia simu ona informasaun kona-ba kazu pesoal PSIK lori pistola ameasa joven na’in tolu nune'e presiza halo averiguasaun hodi hatene motivu akontesimentu ida ne'e.

"Laiha razaun pesoal PSIK ida atu uza patrimoniu estadu hanesan arma ba interese pesoal ho forma seluk ameasa ema-nia vida, la'ós apropriadu ida, alarma ba pesoal PSIK hotu ita la adminte," dehan Sergio ba jornalista sira hafoin reuniaun Konsellu Ministru, iha Palasiu Governu, Kuarta (12/02).

Tuir nia, laiha razaun ba pesoal PSIK ida hodi utiliza propriedade estadu nian ho situasaun saida de’it ameasa fali sidadaun ida. Tan ne’e husu ba Diretor Jerál PSIK ho estrutura tenke foti medidas balun.

"Dala ida tan, se ida ne'e akontese hanesan infromasaun sira espalla ona iha media komunikasaun sosiál, hanesan Ministru ha'u la adminte," katak nia.

Komanadante Jerál PNTL, Komisariu Jerál Polísia Henrique da Costa hatete, Departamentu Investigasaun Kriminál Nasionál (DIKN) rejista ona kazu pesoal PSIK lori pistola ameasa joven na’in tolu iha area Delta.

"Sim, ita rejista duni ona kazu pesoal PSIK ida lori Pistola ameasa joven na’in tolu iha area Delta. Agora ita-nia investigasaun hala'o hela prosesu ida ne'e, depois aprezenta ba Ministeriu Públiku kontinua halo prosesu ba oin atu hetan desizaun ruma ligadu ho kazu ida ne'e," dehan Henrique.

Iha fatin ketak, Diretór Nasionál PSIK, Vicente Fernandes e Brito hatete, parte investigasaun rekolla informasaun sira hotu bainhira iha indisiu forte sei aplika prosesu disiplinár ba membru ne’ebé ameasa sidadaun sira ho arma.

Molok ne’e, tuir informasaun kazu ne'e akontese iha Sabadu (8/2), tuku 01:00 dader nakukun, bainhira joven na’in rua hamaluk sira-nia kolega ne’ebé fa’an sigaru iha dalan-ninin.

Joven na’in tolu ne’ebé hetan ameasa husi pesoal PNSIK mak Salvador Leitão Belo Ximenes ho idade tinan 17, Aderito Placido  Moreira (17), no Abilio Alberto Soares Carlos (17).

Iha 10 Fevereiru, horseik, Abilio hamutuk ho nia kolega na’in rua, hakat ba kuartel jeral PNTL hodi hato’o keixa ba Departamentu Investigasaun Kriminál Nasionál.

"Ohin ha'u ho ha'u-nia kolega na’in rua ami mai iha ne’e hato'o keixa ba PNTL, tanba pesoal Polísia Sientífika Investigasaun Kriminál ida lori pistola tiru ameasa ami," dehan Abilio ba jornalista sira, hafoin keixa iha edifisiu Kuartel Jerál PNTL, Kaikoli (10/02).

Nia dehan, pesoal PSIK lori pistola ameasa tiru sa'e dala rua nune’e sira na’in tolu tauk hodi halai namkari.

"Ha'u mak faan sigaru kalan, ha'u mesak ha’u tauk, entaun ha'u konvida ha'u-nia kolega na’in rua mai akompaña ha'u faan sigaru mak derrepente maun PSIK ne'e ba karega pistola hatudu ba ami, depois tiru sa'e ba leten dala rua,” Abilio konta.