Portavoz Sabino Hornai hateten, relasiona ho gravasaun vidio neʼebé virál iha média sosiál kona-ba aktu krimi envolve pesoal membru Polísia Nasionál Timor-Leste (PNTL) Munisipiu Vikeke nain-4 halo agresaun fiziku hasoru vitima Lourenço Gusmão ne'ebé sofre hela moras difisiente mental iha 06 Fulan Fevereiru foin lalais iha Munisípiu Vikeke.
Nia dehan iha Konstituisaun Repúblika Demokrátika Timor-Leste hakerek ona iha artigu 29, kona-ba "Direitu ba Moris", ne'ebé iha aliña-1 (Labele viola ema ida nia vida), aliña-2 (Estadu rekoñese no garante direitu ba vida), no aliña-3 (lha Repúblika Demokrátika Timor-Leste laiha kastigu nu'udar mate-kotu).
"Husi artigu ida-ne'e ami familia vitima kumpriende katak ema hotu iha direitu ba moris tanba ne'e atuasaun Polísia Nasional Timor-Leste husi Munisipiu Viqueque nain-4 ne'ebé halo asaun hasoru sidadaun ne'e kontra prinsipiu direitus umanus nian no ita lakohi ida-ne'e akontese iha ita nian rai doben Timor-Leste tanba rai ne'e estadu direitu demokrátiku no direitos humanos mak tenki boot liu," dehan Sabino iha komferensia imprensa iha Jardim 05 de Maiu (12/02).
Nune'e iha atigu seluk husi Konstituisaun Repúblika Demokrátika Timor-Leste iha artigu 31, kona-ba "Hala'o Lei Krimi Nian", liuliu iha aliña-3 katak "labele fő uluk pena eh medida seguransa nian ba ema ida iha momentu nia halo krimi, bainhira hahalok ne'e ladauk hakerek iha lei.
"Husi artigu ho nia aliña ida-ne'e, ami familia vitima kumpriende katak bainhira sidadaun ida komete krimi PNTL mak hanesan seguransa nasionál ba nasaun no povu labele fo uluk pena no medida ba sidaduan ne'ebé mak halo krimi bainhira hahalok ne'e seidauk hakerek iha lei tanba ne'e atuasaun Polísia Nasionál Timor-Leste husi Munisipiu Vikeke ne'e, ami familia vitima konsidera katak atuasaun ne'e la'ós profesionál maibé ne'e hahalok Kriminizu ou preman nian, vitima halo sala ka'er nía hodi prosesu tuir lei, Polísia labele aplika lei maibė kontra fali lei ne'e," afirma nia.
Tanba ne'e iha Dekreto-Lei N.º: 43/2011 kona-ba rejime uza Forsa Atuasaun husi Polísia Nasional Timor-Leste Munisipiu Vikeke ba kazu baku vitima ne'e tuir loloos atu atua ema ruma, tenki la'o tuir lei tanba lei ne'e dehan ona ho nía sirkutánsia ou situasaun saida mak bele uza forsa hanesan, uza gas airmata, stick ou kastete, pistola to'o kilat boot maibé atuasaun, maibé polísia nain 4 hobur no baku lisuk ema ida neʼebé la fó ameasa no la halo situasaun perigoju hasoru sira, se dehan ema ne'e atu halai hasoru Polísia ne'e mós Polísia iha mekanismu própriu laós sira tenki tuku no tebe, tanba ne'e familia konsidera laloos no aktu ne'e aktu krimi bandalismu nian.
"Ami familia vitima la konkorda kona-ba klarifikasaun kronolojia kazu ba públiku husi Komisariu Jerál Polísia, Henrique da Costa ne'ebé hatete katak vitima nia familia sira husu ona deskulpa ba PNTL Munisipiu Vikeke ne'e ami konsidera informasaun ne'e la loos, tanba familia vitima ba hasoru Komandante PNTL Munisipiu Vikeke ho razaun katak vitima moras mentál tanba ne'e ami familia husu para sai lalais hodi halo tratamentu no labele akontense buat ida ba nia aan no razaun seluk mak sela ne'ebé vitima detein ba ne'e la hijine," esplika nia.
Nia informa família vitima la konkorda no rejeita mós deklarasaun Komisariu Jerál Polísia, Henrique da Costa ne'ebé hatete katak iha akontesimentu ne'e vitima lori arma branka hanesan tudik ne'ebé konsidera kontra kódigu penál no Dekretu-Lei Númeru: 5/2017 maibé realidade husi akontesimentu ne'e familia hakarak relata loloos katak vitima la lori arma branka maibé iha motor kotuk ne'e mak vitima kesi pasta kiik oan ida neʼebé iha laran xave no vitima ba ne'ebé de'ït nia sempre lori tanba nia ema tékniku tratornista.
"Ita tenki koalia onestu ba malu no jura ba rai ida-ne'e tanba rai ne'e lulik ita sosa ho ruin no ran, tanba ne'e ita koali'a buat ne'ebé loos no labele habosok no inventa, tanba ne'e ami familia vitima hakarak relata loloos kronolojia akontesimentu," tenik protavos ne’e.
