Xefe Suku Kuluhun, Deus Dado Martin hatete, iha 11 Fevereiru ekipa konjunta ne'ebé mak lídera SEATOU no Ministériu Obras Públika tuun direita hodi halo observasaun ba komunidade sira iha suku Kuluhun to'o Bekora ne’ebé sobu rasik sira-nia uma.

"Komunidade sira husu pergunta katak ‘liurai, data fiksu ida ne'ebé mak ita-nia Sekretáriu Estadu mai promete hela ba ita katak to'o dia 9 Fevereiru ita-nia Sekretáriu Estadu atu mai book, maibé até a data seidauk, ne'ebé liurai sira bele haree data fiksu sira par fo hela ba komunidade par hatene’.”

“Entaun ha'u hatan ‘data fiksu laiha, tanba horseik ita-nia exelénsia na'in rua tuun ne'e atu halo observasaun direita de'it. Maibé sira seidauk dehan katak amu suku, data fiksu mak ne'e, ida ne'e ita-nia sua exelénsia na'in rua la fó data fiksu," dehan Xefe Suku ne’e iha Sede Suku Kuluhun, Kuarta (12/02).

Total uma-kain iha suku Kuluhun ne’ebé sei hetan eviksaun iha 33.

"Inísiu iha de'it 31, maibé iha komunidade balun to'o mai dehan sira-nia uma la kona maibé kona rai, ezemplu hanesan odamatan oin kona, ne’e mak hamutuk ho uma ne'e total 33, ne'ebé mak afeita ba alargamentu ba estrada refere," dehan nia.

Tanba ne'e mak hanesan lideransa Komunitáriu suku Kuluhun hakarak husu ba ekipa konjunta ne'ebé atu data fiksu ba eviksaun.

Molok ne'e, ekipa konjunta ne'ebé lídera husi SEATOU fó prazu fulan ida ba komunidade sira atu parepara an hodi sai husi sira-nia uma, hahú husi 9 Janeiru to'o 9 Fevereiru tinan ne’e.