Xefi Suku Hatolia, Manuel Soares hatete, aldeia rua iha Suku Hatolia desde ukun an to’o ohin loron seidauk asesu eletrisidade.
"Aldeia Hatubatu ho Aldeia Simuhei populasaun sira nafatin moris iha nakukun laran no uza lilin no lampu iha tempu kalan,” dehan Xefe Suku ne’e ba jornalista INDEPENDENTE, via telefone, Kuarta (12/02).
Xefe Suku ne’e dehan, aldeia Simuhei sai nu’udar aldeia ne'ebé iha tempu rezistensia sai subar fatin ba FALINTIL sira subar.
Iha tinan 2023, Xefe Suku ne’e dehan, nia parte hato’o ona proposta ba Eletrisidade Timor-Leste, Emprezariu Públiku (EDTL.EP), maibé to'o agora seidauk iha rezultadu.
Tuir dadus, populasaun ne'ebé la asesu ba eletrisidade hamutuk uma-kain 317.
"Ami hein de’it, espera katak bele reliza iha tinan 2025 nia laran. Ha’u fiar ho ho kompromisiu politika nono Governu nian,” dehan nia.
Suku Hatolia kompostu husi aldeia haat mak hanesan: aldeia Simuhei, aldeia Hatubatu, aldeia Aimeraulu no aldeia Hohopu ho nia populasaun hamutuk na’in 5.452, ho total uma-kain 942.
Iha sorin seluk, joventude suku Hatolia, Evaristo dos Reis Fereira afirma, aldeia rua iha suku Hatolia hasoru problema eletrisidade.
Juventude ne’e husu ba parte relevante sira atu tau prioridade ba preokupasaun ne'ebé mak populasaun sira hasoru.
"Ukun an tinan 24 ona maibé populasaun iha aldeia rua ne’e nafatin moris iha nakukun laran no halerik ba eletrisidade, tanbà ne'e parte relevante tenke tau-matan mós ba asuntu ne'e," katak nia.
