Munsiñur Marco Sprizzi hatete, ninia misaun iha Timor-Leste termina ona nu’udar reprezentante Santu Padre Papa Francisco.

Nune’e mós, nia rekoñese, tinan neen, sai tinan ne’ebé estraordinariu, tanba durante iha Timor-Leste nia vizita kapela sira iha munisipiu, husi aldeia to’o ba iha postu administrative sira.

“Tinan neen, tinan ne'ebé estraordináriu, Timor-Leste tama iha ha'u nia fuan, no sei nunka sai husi ne'e. Tinan neen ne'ebé ha'u sente grasa Maromak nian, amizade no efetiu povu Timor-Leste nian. Ha'u vizita munisípiu hotu-hotu, aldeia barak, kapela sira iha área remota sira, no povu Timor-Leste sempre iha ha'u nia fuan," dehan Munsiñur Marco Sprizzi, iha Palasiu Governu, Kinta (13/02).

Reprezentante Santa-Sé ne’e hatutan, Papa Francisco nomeia ona nia nudar Prezidente Autoridade Traballu Vatikanu nian, signifika Ministru Traballu nian, maibé ba Timor-Leste to'o agora seidauk iha informasaun  kona-ba sé maka sei troka nia hanesan Reprezentante Vatikanu nian iha Timor-Leste.

 “Nune’e ita hato’o ita-nia konsiderasaun no vizaun ba futuru, ba Primeiru-Ministru ho forma amigavel hodi kontinua harii Estadu nasaun ida ne’ebé hamutuk kontinua servisu igreja nian hodi forma ema ne’ebé nakonu ho domin, iha konxiénsia, profisionalizmu iha servisu ,atu nune’e nasaun ne’e bele nabilan liután iha mundu tomak”, katak nia.

Reprezentante Vatikanu ne’e rekoñese katak buat barak maka alkansa ona iha tinan neen ikus ne’e, hahú hosi Edifísiu Nunsiatura Apostólika, Universidade Katólika, Tribunál Igreja nian no Amu-Papa nia vizita ne’ebé sei husik nafatin impresaun iha ema Timor-Leste tomak nia fuan no to’o Amu-Papa rasik hatete katak monu ba domin ho Timor-Leste.

Iha enkontru ne’e, sira na’in rua ko’alia mós kona-ba papél boot Igreja nian, liuliu tulun jerasaun foin-sa’e sira atu luta ho dalan oioin, luta ba dezenvolvimentu ne’ebé la’ós de’it ekonómiku, maibé mós dezenvolvimentu sosiál, atu tane aas justisa, igualdade, hodi tau matan ba ema hotu.

"Timor-Leste bele sai ezemplu ba mundu tomak, maibé joven sira tenki fiar iha ida ne'e, hodi servisu ho konfiansa no ho sentidu armonia sosiál, no Igreja bele tulun joven sira iha jornada ne'e. ami diskuti mós ida ne'e ho Primeiru-Ministru kona-ba dalan sira, atu halo parseria ho edukasaun iha eskola no universidade sira hodi la'o iha dalan ida ne'ebé espesífiku ba Timor-Leste,”tenik nia.

Entretantu, iha biban ne’e, Primeiru-Ministru mós agradese bá kolaborasaun ne’ebé iha durante reprezenta Papa Francisco iha Timor-Leste.

“Liu husi Konsellu Ministru ami hasai rezolusaun ida hodi husu ba Parlamentu Nasional atu hasai votu louvor ba nia tanba ho nia esforsu konsege lori Papa Francisco mai Timor,” dehan PM Xanana.

Enkuantu, Munseñor Marco Sprizzi simu kna’ar nu’udár reprezentante Vatikanu iha TL iha loron 28 fulan-Fevereiru tinan 2019.