“Ha’u mai informa ba Prezidente Repúblika konaba atividade semana ida nian. Horseik (12/02/25), iha Konsellu Ministrus mak ami haree programa barak konaba dezenvolvimentu ita nia rain, ema hotu komprende ona katak iha kedas IV Governu ami define katak baze ba dezenvolvimentu mak infraestrutura bázikas,”dehan PM Xanana, hafoin remata enkontru ho Prezidente Repúblika José Ramos Horta iha Palasiu Prezidensial Aitarak-Laran, Dili, kinta ne’e (13/02/25).

Primeiru Ministru hatutan, bainhira temi kona ba infrastrutura bazika mak hanesan estrada husi nasional, rejional, lokal no área rural.

Nune’e, Governu tenta atu buka hadi’a buat ne’ebé seida’uk hadi’a iha IV Governu.

“Ita tenta kontinua buka atu hadi’a buat ne’ebé iha IV Governu ami hasai, tanba ita haree katak povu no Estadu ne’e atu la’o ho di’ak iha futuru no prepara ba futuru  saúde no edukasaun mak baze,” tenik PM Xanana.

Entretantu, Xefe Governu hatutan, Governu haree fator tolu ne’ebé garante dezenvolvimentu to’o iha área rural mak Estrada, bee no eletrisidade.

“Baziku rua ba dezenvolvimentu ita nia rai saude ho edukasaun ho ida ne’e mak ami buka dadauk, no hare ba fatores tolu ne'ebé bele garante katak dezenvolvimentu bele ba to'o iha area rurais mak estrada, Eletrisidade no bee," tenik PM Xanana.