Atividade handover ne'e hala'o iha Edifisu Ministériu Administrasaun Estatál iha loron 28 fulan Janeiru tinan 2025, iha Oras tuku 10:00, maibé Ministru la autoriza media atu halo atividade refere.
Enkuantu, informasaun ne'ebé Jornalista sira asesu kona-bá atividade refere mai husi ofisiál média Autoridade Munisipiu Dili, ne'ebé haruka média sira atu halo kobertura ba atividade handover ne'e.
Maibé, hafoin iha oras tuku 9:50, Prezidente Autoridade Munisípiu sesante to'o iha edifisiu MAE no tama ba edifisiu Ministru Administrasaun Estatál nia fatin, nune'e Jornalista sira tuir maibé to'o de'it iha eskada, Seguransa husi Ministru nian la fó tama ho razaun Ministru la hatan média atu halo kobertura.
Seguransa husi Ministru ne'ebé la konsege foti nia naran, fó hatene ona ba Jornalista INDEPENDENTE katak atividade ne'e Ministru la haruka média hotu-hotu atu tama.
“Tanba ne'e imi hein iha kraik, hein PAM sai mak imi intervista de'it,”dehan Seguransa ne’e, iha edifisiu MAE, tersa (28/01/25).
Hafoin remata handover, Jornalista sira atu halo intervista ho PAM Dili sesante maibé PAM haruka Jornalista sira atu halo intervista deit iha Edifisiu Autoridade Munisipiu Dili iha Matadoru.
