Ministru “Oan-Soru” husu bá Kombatente sira hotu-hotu atu labele fiar ema irresponsável sira ne’ebé mak oras ne'e dadauk lori formuláriu reklamasaun no kontestasaun ‘falsu’ nian, hodi halo kobransa ilegál.

“Hakarak aproveita mós ita-boot sira, fó hela informasaun katak, agora dadauk, iha ema balu hasai hela formuláriu kontestasaun no reklamasaun ne’e, hodi bá la’o lemo-lemo, lohi ema, bosok ema. ó nian ne’e fó mai ha’u mak  priénxe, para ó bele hetan lalais 8 a 14, Ne’ebé, ema kontribui ka kobra hela ema tesik iha ne’e, favor ida, husu bá públiku, situasaun hanesan ne’e mak akontese iha Kombatente sé de’it nia uma, favor ida labele kontribui,” dehan Ministru Oan-Soru iha Palasiu Governu, Segunda (27/01).

Governante ne’e esplika, formuláriu ne’ebé kombatente sira foti ka simu hosi tékniku sira iha CCLM Munisípiu sira, sira na’in rasik mak tenke priénxe, ho sira-nian testamuña, tanba dokumentu sira ne’e hotu bainhira enkamiña mai nasionál, ekipa sira sei konfirma fila-fali ho dadus ne’ebé mak antes ne’e Kombatente sira fó liuhosi verifikasaun no rejístu.

“Ne’ebé, oras ida konfirma ne’e, dokumentu iha tolu, Kestionáriu bá Rejístu, Formuláriu bá Verifikasaun, no Formuláriu bá Kontestasaun ka Reklamasaun," katak Ministru.

Hatutan tan katak, Iha formulariu tolu ne’e, ekipa sei konfirma hamutuk mak lalos sei hasoru lei.

“Tan ne'e husu bá ema hotu-hotu atu koopera ho ida ne’e, tanba ha’u hatene, no iha informasaun katak, iha buat balu hanesan ne’e, agora dadauk la’o,” Ministru “Oan-Soru”, fó hanoin.