Grigorio Saldanha Mouris” liu husi konferensia imprensa hatete, nia parte la konkorda ho atuasaun SEATOU nian hasoru populasaun sira ne’ebé buka moris iha espasu públiku liuliu iha munispiu Dili hodi estraga vendedor sira nia sasan.
“Konflitu kompeténsia, Diresaun Jestaun Merkadu no Turizmu (GMT) ne'ebé halao serbisu munisipál nian, tuir lolós submete ba autoridade munisípiu Dili maibé infelizmente SEATOU maka kontrola lor-loron hodi atua ho violénsia hasoru vendedores ambulantes ka komunidade kiak sira ne'ebé hela iha espasu públiku ho sira nia sasán. hanesan konsekuénsia, Autoridade Munisipiu Dili maka hetan fali kritiku no akujasaun husi públiku hanesan autór no responsável,” dehan nia ba Jornalista sira iha edifisiu AMD, Tersa (28/01).
Nia hatutan, iregularidade administrativu no finanseiru ne ebé durante iha nia mandate ne’ebé akontese grave tebes iha prosesu administrativu, inklui falsifikasaun dokumentu no prosesu sira ne’ebé duviduzu.
“Ha'u-nia mandatu, ha'u hasoru iregularidade grave sira iha prosesu administrativu, inklui falsifikasaun dokumentu no prosesu sira ne'ebé duviduzu. preokupante liu mak situasaun iha servisu rekolla lixu manual, ne'ebé identifika tinan ida halakon osan estadu mais au menus dólar millaun ida,” katak Nia.
Salienta tan katak, Dadus sira-ne'e fasilita husi relatóriu ne’ebé rejistu husi sistema automátiku Tibar nian no evidensia fotográfiku no videográfiku husi fulan agostu 2023 to'o agostu 2024. Iha loron hirak liu ba SEATOU konfirma rasik, bainhira halo verifikasaun surpreza ba kamioneta tula lixu nian sira.
Razaun ida mak, falta autonomia administrative, dependénsia demais AMD ba Ministériu Administrasaun Estatal (MAE) estraga kapasidade atu prepara didi'ak desentralizasaun poder lokál, tuir politika IX Governu nian.
“Nune’e mós, obstákulu ba realizasaun auditoria, iha fulan setembru 2024, ha'u husu ba señor Ministru Administrasaun Estatal atu halo auditoria ba servisu AMD nian. maibé, auditoria ne'e foin hahú iha dezembru no to'o agora, nia parte seidauk simu informasaun ruma kona-ba ninia rezultadu. situasaun ida-ne'e fó impaktu medida koretiva sira ne'ebé urjente no trava implementasaun,”tenik nia.
Aleinde, desizaun unilaterál no falta koordenasaun, intensaun atu transfere unidade Project Management Unit (PMU) husi AMD ba MAE prejudika sira nia kapasidade atu superviziona téknikamente servisu limpeza urbana. piór liu tan, MAE halo estensaun kontratu empreza limpeza sira, sem konsulta uluk ho AMD ida ne'e hamate esforsu sira ba melloria no prejudika ijiene no saúde públiku sidadaun DILI nian.
Inklui, preokupasaun étika no sosiál, hanesan sidadaun, veteranu no prezidente autoridade munisipál. Nia labele simu prátika violentu sira ne'ebé haterus tan sidadaun Dili, sem kria uluk kondisaun mínima alternativa. Ne’ebé sira rejista katak, situasaun ida ne'e atu repete fali prátika desumanu sira neʼebé uluk ema rai seluk sira halo hasoru ita nia povu, hahalok iresponsável neʼebé ita nunka konkorda to'o ita manán independénsia
“Haree ba buat sira ne'ebé temi iha leten, ha'u konklui katak realidade sira ne'e maka trava ha'u atu hala'o ha'u-nia knaar ho efikásia no integridade, ne'ebé ha'u konsidera importante. ha'u ho ha'u-nia ekipa serbisu maka'as ona atu hadi'a Autoridade Munisipiu Dili, kombate indisiplina, korupsaun, nepotizmu no prátika familiarismu nian, tuir kompromisu governu ix nian,” katak Grigoriu Saldanha.
“Maibé infelizmente, obstákulu sira neʼebé hasoru, sente hanesan la hetan apoiu institusional hodi kumpri promesa sira ne'ebé halo ona ba povu timor leste, liu-liu kapitál Díli. Nune'e, halo nia prezensa iha kargu PAM Dili ne'e, la sustentável ona atu kontinua,”.
Maski nune'e, Grigorio iha nia dever atu hato'o agradesimentu ba fiar no kolaborasaun husi kolega sira iha AMD husi superiór sira iha MAE no IX governu ne’ebé lidera husi husi Primeriu Ministru Kay Rala Xanana Gusmão.
Grigorio saldanha m’os husu deskulpa ba povu sidade Díli tanba tenki para iha dalan klaran, maski iha ona planu oinsá dezenvolve sidade díli ba oin kona ba lixu, merkadu, rate, jardin, no atendimentu sira seluk ba komunidade nia nesesidade sira.
“Deklara ba públiku ha’u nia rezignasaun nu’udar PAM Díli,”.
“Ha’u deseja susesu ba PAM foun atu kontinua serbisu lalais maibé lolós hodi lori mudansa sira, no afirma ha'u nia kompromisu ba dezenvolvimentu sidade dili, no moris diak ba sidadaun sira hotu,” nia hakotu.
