Primeiru-Ministru hato’o konsiderasaun ne’e bainhira hasoru-malu ho Tony Burke MP iha Palásiu Governu, tersa (28/01/2025).
Durante vizita ko’alia liu kona-bá relasaun kooperasaun amizade entre Austrália ho Timor-Leste, liu-liu ko’alia kona-bá Timor-oan sira ne’ebé bá servisu iha Austrália, kona-bá seguransa no Ciber Security.
“Ita apresia tebes tanba Ministru Tony bele mai to’o iha ne’e hodi reforsa ita nia kooperasaun. Sisra mós apoia ita tama ASEAN. Ami rua ko’alia en-jeral de’it,espesifiku sira ko’alia ho minstru sira,” dehan PM Xanana liu husi komunikadu ne’ebé Online INDEPENDENTE asesu, (29/01/25).
Iha fatin hanesan, Ministru Tony Burke MP hateten, relasaun amizade entre TL ho Austrália forte tebes, liu-liu iha área edukasaun no mós ho traballadór sira tanba iha relasaun forte entre ema ho ema.
Tanba ne’e, Austrália komprometidu atu kontinua servisu hamutuk ho TL hodi rezolve dezafíu sira ne’ebé fahe hamutuk hanesan migrasaun irregulár, inklui kontrabandu ka hatama ema ho illegál, tráfiku umanu, jestaun fronteira no seguransa sibernétika.
Entretantu, molok hasoru malu ho PM Xanana Gusmão, Ministru Australianu ne’e hasoru-malu ona ho Prezidente Repúblika, José Ramos-Horta, Ministru Interiór Francisco da Costa Guterres, sei hasoru-malu mós ho Ministru Transporte no Komunikasaun, Miguel Marques Manetelu.
Enkuantu, durante enkontru Xefe Governu akompañadu husi Ministru Prezidénsia Konsellu Ministru, Agio Pereira, Ministru Negósiu Estranjeiru no Kooperasaun, Bendito dos Santos Freitas, Ministru Interiór, Francisco da Costa Guterres, Embaixadora TL iha Austrália, Inês Almeira no Xefe Gabinete PM, Elizabeth Exposto no Ministru Tony Burke akompaña husi Embaixadora Austrália iha TL, Caitlin Wilson.
