Primeiru-Ministru husu ne’e tanba fatin ne’e mós sai hanesan fatin istóriku bá prosesu luta libertasaun nasaionál, iha ne’ebé Kay Rala Xanana Gusmão rasik hela iha fatin ne’e, hodi estabelese Rejiaun IV iha tinan 1991.
“Ha’u mai iha-ne’e lori ho diretór AMRT, Jorge Alves ne’ebé iha ona planu atu prezerva fatin istóriku ida ne’ebé fó apoiu maka’as iha funu laran. Ami mai atu haree, parte AMRT sei halo tán buat ruma bazeia bá ninia planu reabilitasaun bá fatin istóriku ne’e, inklui fatin sira seluk tán,” dehan Primeiru-Ministru liu husi Komunikadu ne'ebé Online INDEPENDENTE asesu iha Pájina ofisiál GPM, Kinta (30/01).
Tanba Iha tinan 2021, Kay Rala Xanana Gusmão planeia atu selebra aniversáriu moris nian (20 Juñu) hamutuk ho família sira iha abrigu Nunutali tanba fatin ne’e mós kompleta tinan 30 momentu líder rezisténsia ne’e mai hela iha-ne’e, hodi estabelese Rejiaun IV, maibé la konsege realiza tanba iha momentu ne’ebá mundu enfrenta hela pandemia Covid-19.
“Tan ne’e maka, ohin konsege mai to’o iha fatin ne’e hodi hasoru-malu ho Veteranu Luis António Salsinha (Airmano Raikutun) ho nia kaben Veterana Armanda Araújo Arranhado (Hallima) ne’ebé iha tempu luta konsege oferese kuartu simples ida bá Xanana Gusmão ho gerrilleiru kuaze na'in-lima hodi subar-aan no kontinua luta bá libertasaun nasionál,”tenik komunikadu refere.
Durante loron sorin, Primeiru-Ministru kura saudades ho kazál ne’e hamutuk ho oan sira, konta istória moruk no midar ne’ebé enfrenta durante tempu pasadu bainhira hela iha uma simples ne’e.
Xanana Gusmão mós konta tuir katak, bainhira mai to’o iha fatin ida-ne’e iha tinan 1991, hetan apoiu maka’as hosi Veteranu Ernesto Fernandes (Dudu) ho sira seluk hodi bele harii zona gerilla foun ida.
“Durante ha’u iha-ne’e, Armanda ho Luis mak fó seguransa atu ema labele haree hetan ha’u. Luis hanesan ha’u nia kondutór ne’ebé tula ha’u bá mai no fatin ida-ne’e ha’u mai dala barak. To’o loron ida inimigu sira rona katak ha’u iha hela área Ermera nian, tanba ne’e maka estafeta Xina oan ida ho naran Acinto mai tula ha’u iha-ne’e ho motór bá fali Dili,” Xanana Gusmão konta-tuir.
Tanba ne’e, fatin ida-ne’e istóriku tebes, la’ós de’it Xanana mai atu deskansa maibé mai atu servisu hanesan mós fatin sira seluk ne’ebé mak sei bá vizita iha tempu sira tuir-mai.
Iha loron 14 fulan juñu tinan 2020, Kay Rala Xanana Gusmão hala’o vizita bá abrigu ne’e no konta katak, iha tinan 1991, hala'o viazen hosi Ponta Leste Lospalos liu hosi Viqueque, Baucau, Manatuto, Ainaro to’o Ermera hodi subar iha Veteranu Luis António Salsinha (Airmano Raikutun) no nia kaben Veterana Armanda Araújo Arranhado (Hallima) ne’ebé oferese kuartu simples ida hodi subar no kontinua luta bá libertasaun pátria.
Xanana Gusmão nunka haluha iha nia moris, bainhira hala'o vizita bá munisípiu sira sempre fó tempu vizita hikas ema sira ne'ebé sakrifika vida iha tempu susar hodi salva ninia vida hosi inimigu.
Uma iha Nunutali ne'e sai hanesan muzeu ki'ik, iha kuartu laran ne'e sei rai hela obra rezisténsia barak hanesan fotografia Xanana ho gerrilleiru sira hala’o enkontru, rádiu komunikasaun, armáriu, meza, kadeira no mesin ketik antigu ida ne'ebé uluk Xanana uza hodi hakerek mensajen bá gerrilleiru sira durante luta.
Fasilidade hirak ne’ebé iha kuartu laran ne’e Xanana utiliza hodi halo servisu iha tinan 29 liubá, hodi orienta funu no halo estratejia funu hasoru okupasaun.
Iha tinan 1991, matebian Padre Mário Belo (ne’ebé koñese-malu kleur iha Seminário Dare) maka lori Xanana Gusmão sai hosi Lospalos bá Ermera ho objetivu atu buka-tuir kuadru rezisténsia ne'ebé sei moris hanesan, Ernesto Fernandes (Dudu), Eduadro Barreto (Dusae), Koordenadór OJETIL, Paulino Monteiro akompaña hosi Sera Key, Konis Santana no gerrilleiru sira seluk tán inklui sira ne’ebé hosi Liquiça maka matebian Komandante Maucaro 305, Jaime Ribeiro “Samba Sembilan” atu halibur kuadru FALINTIL hodi kontinua halo gerrilla.
Iha Ermera, Xanana mós subar iha fatin rezisténsia Aiceu, Suku Raimerhei besik malu ho Komandante Konis Santana iha Mertuto hodi halo ligasaun ho povu atu apoia hahán bá gerrilleiru sira hodi halu’an bá Zona Bobonaro, Atsabe, Cailaco to’o Suai.
Iha tinan 1992, inimigu kaer Xanana Gusmão iha Lahane-Dili, maibé prosesu gerrilla kontinua lidera hosi Komandante Nino Konis Santana ho komandante sira seluk hanesan David Alex Daitula, Taur Matan Ruak no komandante sira seluk tán.
Iha fatin hanesan, Diretór Ezekutivu AMRT, Jorge Alves aprezenta programa bá Primeiru-Ministru Kay Rala Xanana Gusmão katak, AMRT iha ona planu fixu bá reabilitasaun fatin abrigu sira ne’ebé identifikadu inklui abrigu Nunutali ne’ebé sei reabilita iha tinan ida-ne’e nia laran.
Veteranu Luis António Salsinha ho nia espoza Veterana Armanda Araújo Arranhado "Hallima" espresa sentimentu kontente kahur ho matan-been tanba hanoin hikas istória pasadu ne’ebé nakonu ho triste no trauma.
Maski nune’e, kazál ne’e prometa atu harohan nafatin hosi husu Maromak Nia tulun hodi haraik nafatin isin diak bá Primeiru-Ministru, Kay Rala Xanana Gusmão atu kontinua lori rai ne’e bá futuru ne’ebé di’ak liu.
Família ne’e mós komprometidu atu hakerek istória ne’e tomak, hodi bele rai bá jerasaun sira tuir-mai, bele mós fahe bá eskola sira iha Timor laran tomak atu hatene.
Partisipa mós iha vizita ne’e, Prezidente Autoridade Munisípiu Ermera, José Martinho dos Santos Soares, Veteranu Ernesto Fernandes ‘Dudu’ no mós autoridade lokál sira.
