Ministru Edukasaun Juventude no Desportu, Armindo Maia, hatete, anunsia de'it rezultadu ezame nasional ne'ebé realiza ona iha loron 24-26 Outobru 2022.
“Ohin (09/12), anunsia rezultadu ezame Nasionàl hahú husi nivél Ensinu Báziku, Ensinu Sekundáriu Jéral (ESJ), Eskola Tékniku Vokasional (ETV) no Ensinu Rekorrente,”dehan nia iha salaun MEJD, Vila Verde, sesta (09/12).
Governante ne’e, esplika, rezultadu ezame nasional ba eskola ensinu báziku sira ho total estudante hamutuk 30.888.
Husi númeru ne’e, iha auzente na’in 334 (1,08%) no reprovadu na’in 10 (0,03%).
Nune’e, iha prezente na’in 30.554 (98, 92%) husi ida ne’e mak aprovadu 30.544 (99,97%).
Aleinde, ba Ensinu Sekundáriu Jéral (ESJ), total estudantes hamutuk na’in 22.525. husi númeru ne’e iha auzente na’in 353 (1,57%), prezente 22.172 (98,43%), aprovadu na’in 22.162 (99,95%) no reprovadu na’in 10 (0,05%).
Entretantu, ba Ensinu Tèkniku Vokasional (ETV), ho total estudantes hamutuk na’in 4.339. Husi númeru ne’e iha auzente na’in 98 (2,26%), prezente 4.241 (97,74%), aprovadu 4240 (99,98%) no reprovadu 1(0,02%).
Ba ensinu rekorrente, total estudantes hamutuk 382. Husi númeru ne’e, iha auzente na’in 52 (14%), prezente na’in 330 (86%) aprovadu 100% no reprovadu 0.
Enkuantu, ba mellor estudante, MEJD haktuir, sei fó sai rezultadu iha tempu tuir mai.
