Enkuantu, iha lansamentu ne’e, Primeiru Ministru hetan akompañamentu husi Membru Oitavu Governu Konstitusionál, Deputadu no Deputada sira iha Parlamentu Nasionál, Autoridade Munisípiu Baukau, Autoridade Postu Administrativu Laga no mós Veteranu sira, partisipa iha serimónia lansamentu tau fatuk dahuluk ba projetu rehabilitasaun estrada trosu Laga-Baguia.
Nune’e, konstrusaun ba estrada ne’e ho distansia kilometru 38 resin.
“Serimónia lansamentu ne'e, hala'o iha Weli-Weli Suku Soba, Postu Administrativu Laga. Projetu ne’e sei konstrui husi Kompaña Internasionál Norinco International Cooperation LTD ho kustu millaun $21,7 ba durasaun tinan rua no sei hetan supervizaun husi Kompaña PT. Inacon Luhur Pertiwi, JV Kai Watu Kmanek Consultant, Unip. Lda, no PT. Sinotech Engineering Indonézia,”Online INDEPENDENTE sita iha komunikadu, sesta (09/12).
Tuir komunikadu antes ne’e, iha 29 Agostu liubá Ministériu Finansas liu husi Komisaun Nasionál Aprovizionamentu (CAN-sigla Portugés), ofisialmente públika ona rezultadu aprovizionamentu husi Konkursu Públiku Internasionál ba projetu rehabilitasaun estrada munisipál husi Postu Administrativu Laga ba Postu Administrativu Baguia, Munisipiu Baukau.
Rekorda husi Janeiru 2021 to'o Outubru 2022, Ministériu Finansas liuhusi CNA realiza ona konkursu aprovizionamentu ba projetu sira hamutuk 237 ho totál kustu estimativa hamutuk billiaun $1,1.
“Iha tinan 2021, CNA loke konkursu aprovizionamentu ba projetu hamutuk 117 ho kustu estimativa millaun $483. Tinan ida-ne’e, númeru konkursu projetu sa’e ba 120 ho kustu estimativa millaun $626. Totál projetu durante tinan rua ikus ne’e hamutuk 237 ho kustu estimative dolar amerikanu billiaun $1,1,” Ministru Finansas Rui Gomes hateten.
Entretantu, fontes finansiamentu orsamentu ba projetu pakote 237 ne’e mai husi fontes tolu, hanesan, fundu infraestrutura, fundu la’ós-infraestrutura, no mpréstimu husi Banku Dezenvolvimentu Aziátiku (ADB-sigla Inglés) no Banku Mundiál.
