Diretór Ezekutivu Luta Hamutuk, José Alves da Costa hatete, EDTL lá'os foin mate lakan, bainhira 2010 to'o agora eletrisidade ne'e tauk udan no tauk anin.

Maibé, husu kontinua mellora liután sira-nia servisu, tanba povu selu sira no sira hetan rendimentu ne'ebé makaas, entaun husu nafatin ba sira atu halo manutensaun didi'ak garante ba funsionamentu eletrisidade ba komunidade sira.

"Husu ba Parlamentu Nasionál, Governu halo tan lei atu EDTL nu'udar EP tenke responsabiliza bainhira eletrisidade ida mate derrepente estraga ema nia uma ka ema nia sasán tenke selu. See ha'u-nia jelera aat ha'u bele ba complain… ne'e tenke selu," dehan José, iha salaun Laline Larigutu, Tersa (6/12).

Tanba konsumidór selu, entaun bainhira nia sasán at, estragus tanba la hetan informasaun tenke toma responsablidade, labele dehan estadu nian ne'ebé sasán at mós ida-idak responsabiliza ninian lae tanba konsumidór selu ne'ebé iha direitu atu hetan sé bainhira EDTL-EP ne'e nia atendimentu ladún di'ak no la seguru ba  konsumidór sira.

Iha fatin hanesan, Diretór Ezekutivu FONGTIL Valentim da Costa Pinto hatete, EDTL hanesan empreza ona presiza tenke hadi’a servisu sira orienta sira-nia ekipa tékniku sira hodi kontrola liña eletrisidade sira atu bele halo atuasaun imediata.

Tanba komunidade sira kumpre ona sosa pulsa hatudu katak sira kumpre sira-nia direitu, entaun sira mós iha direitu atu asesu ho di'ak.

"Ita husu EDTL-EP tenke hadia sira nia sistema kontrollu liña sira ne'e tenke másimu atu nafatin fornese eletrisidade ba ema hotu. Tanba bainhira eletrisidade mate ne'e afeta makaas ba uma-kain sira ne'ebé laiha kondisaun natoon no afeta ba sira-nia sasán," haktuir nia.

Nia haktuir, bainhira ema nia sasán sira hetan estragus hanesan ne'e EDTL-EP laiha obrigasaun atu selu entaun EDTL-EP tenke kontinua tau matan haree liña eletrisidade sira ne'e, fornesimentu ne'e tenke la'o ho di'ak rapida, tanba EDTL nia funsionamentu empreza ona tenke hadia servisu ne'e ho di'ak liu ba sidadaun nia direitu.