Tuir Komunikadu Imprensa ne'ebé jornál INDEPENDENTE asesu husi Palasiu Prezidensiál Bairru-Pité, (08/12) katak, sira hakarak haree oinsá bele kontribui ba finansiamentu projetu infraestutura iha Timor-Leste, grupu boot ida, sira bele finansia diretamente ka bele mobiliza investedór seluk, inklui banku impréstimu, ne’ebé ho funan kiik menus husi pursentu tolu (3).
Iha komunikadu ne’e Xefe Estadu hatete, empreza hirak ne'e bele finansia Greater Sunrise to'o billaun $12 no prefere halo mós investimentu iha área infraestrutura.
Sira mós hakarak iha atividade investimentu barak liu, tanba sira iha investimentu iha Áfrika no sira mós bele halo planu ba Timor-Leste kona-ba Aeroportu, Estrada, Ospital, no uma ba kbi’it laek sira rihun ba rihun tuir negosiasaun ruma karik governu interesadu bele hasoru sira, hodi prepara planu investimentu ida ne’e.
Xefe Estadu mós biban ne'e hasoru malu ho Open Society-Asia Pacific, kona-ba planu investmentu ne’ebé antes ne’e Xefe Estadu ko'alia ona ho nia Fundadór George Soros nu’udár billionáriu Amerikanu.
“Grupu ne’e ema billionáriu Amerikanu ida nian, ha’u enkontru ona ho sira iha Díli no dala-ida iha Nova Iorké, no ha’u husu ba sira ajuda halo revizaun ba Planu Estratéjiku Dezenvolvimentu Nasionál (PEDN) 2011-2030, tanbá hahu planu PEDN no iha implementasaun 2011, tinan 10 liu ona, atu haree saida mak halo di’ák, saida mak iha fallansu iha planu ne’e no tamba ekonomia mundiál ne’e muda aan ba mai, se aspetu planu balun ita mantein ou bele halo alterasaun no adaptasaun konforme situasaun rejionál no mundiál," haktuir husi Xefe Estadu iha komunikadu ne’e.
Alende mós, revizaun ba PEDN presiza duni, hodi adapta tuir nesesidade industrial ne'ebé hanaran intelijénsia artifisiál teknolojia dijitalizasaun.
Nune'e Xefe Estadu mós husu ekipa avaliadór kontinua halo revizaun ba PEDN no bainhira remata bele halo diskusaun hamutuk entre revizaun husi Grupu Open Society no parte governu mós presiza halo klean.
Open Sosiety hahú servisu ona iha fulan hirak ne’e nia laran, no inisiu tinan 2023, bele entrega ona sira nia estudu ba PR no proposta estratejia ba Timor-Leste.
Entretantu, Emprezáriu husi Kwait, Al-Bader Internationál Development, disponivel atu ko'alia ho governu hodi harii uma ba sidadaun vulnerável, husi dezeñu, proposta orsamental no tuir padraun ne'ebé sira aplika ona iha rai barak.
Nia haktuir, sei la gratuita tanba halo konforme akordu entre investór ho governu, Alende ne'e mós xefe ekipa delegasaun husi empreza Al-Bader, Yousef Albader deklara sira prontu atu investe iha area turízmu.
