Nia dehan, pagamentu ne’e tuir lolos halo ona iha fulan novembru, maibé tanba Governu mós iha programa subsidiu uma-kain $200 tan ne’e, pagamentu idozus no invalides ádia fali.

“Tuir lolos ne'e ita hahù tiha ona iha fulan-Novembru nia laran, maibé tanba ita nia Governu iha mós programa apoiu $200 ba kada uma-kain ne'ebé envolve mós Banku Nasional Komèrsiu Timor-Leste (BNCTL), entaun presiza mós uza dadus lubuk ida ho ida ne'e mak ádia ituan pagamentu ba protesaun sosial sira,”dehan nia ba Online INDEPENDENTE, iha knar fatin INSS, Kaikoli, segunda ne’e (12/12).

Nia hatutan, tuir dadus, total idozus no invalide ba faze daruak nian hamutuk rihun 93 resin ho nia orsamentu total hamutuk dolar amerikanu rihun $57.

Iha faze dahuluk, Prezidente ne’e dehan, idozus no invalides balun, seidauk simu, tan ne’e iha faze daruak ne’e sei halo mós pagamentu ba sira.

“Iha faze dahuluk sira (idozus-invalides), balun seidauk simu ho nune'e mai fali segundu faze sira simu dala rua,”Prezidente haktuir.

Nia akresenta, ba idozus no invalides sira ne’ebé iha faze dahuluk seidauk simu, bele relata ba iha Xefe Suku sira, nune’e lori dadus ne’e ba iha pontu vocal sira hafoin hatama iha sistema hodi bele halo pagamentu ba sidadaun refere.

Entretantu, INSS simu ona reklamasaun ba idozus no invalides  hamutuk 700.