Iha kompetisaun final ne’e, ekipa FC Tokodede konsega halakan nia advesariu FC Boca Junior ho golu 1-0 hodi hetan segundu lugar, enkuantu klube AC Mailua hetan terseiru lugar no kuartu lugar okupa husi FC Lere-Loho.
Jogu amizade Taxa Rotativa Avó Nana 2022 ho tema “Unidade Nasional, ami atu ba hotu ona, husik hela imi joven sira, respeita netik funu na’in sira, prepara aan labele fahe malu no labele hamosu funu foun entre imi ho imi” hahú loron 07 Novembru 2022 liubá partisipa hosi klube 32 hosi Lautem.
Lider Lider Istoriku nu’udar mós Prezidente Klube AD-SLB Laura, Kay Rala Xanana Gusmão, agradese durante jogu joventu sira kontinua kesi metin sira nia unidade no domin hodi buka hametin dame liu husi desportu futebol.
Xanana agradese, nia parte ho ekipa tomak realiza Taxa Rotativa Avó Nana 2022 nu’udar parte ida hodi promove mós dokumentu fraternidade umana ne’ebé reafiarma husi Papa Fransisco hodi promove dame ba mundu tomak.
Entretantu, Xanana apela ba joventude sira liu-liu iha Dili atu hadokan husi grupu organizasaun arte marsiál no arte rituál sira ne’ebé la promove dame, maibé buka kria mak problema violensia to’o hamosu krime omesidiu.
“Ita nia rain prepara no presiza imi joven sira ne’ebé tenki prepara aan atu kaer futuru imi nian, tanba iha fatin seluk iha Dili grupu joven sira, baku malu tuda malu. Ida ne’e mak ita hakarak evita hodi halo jogu sira hanesan ne’e hodi imi joven sira hasoru malu joga manan ka lakon, imi kria nafatin dame no domin hodi komunidade sira kontente iha imi nia leet hodi ita fó onra ba ita nia eroi no martires sira,” Xanana apela.
Xanana dehan, klube ne’ebé manan no lakon labele lakon esperansa, maibé buka dezenvolve aan nafatin hodi halo buat ne’ebé pozitivu iha ema ida-idak nia moris.
Iha parte seluk, Xanana husu ba joven sira atu respeita veteranus no inan aman sira ne’ebé moris terus asaun importante ida hodi hatudu kumprimentu di’ak iha ema hotu nia leet.
“Dame no domin ne’e mak ita tenki hametin,tanba ne’e mak imi hotu hahú jogu too mai final,” nia hatete.
Lider istóriku ne’e espera, iha eventu sira tuir mai feto Lautem oan sira tenki partisipa mós iha jogu Basketbol, voly, tenis meja, futebol salaun no boxing.
Fahe Kamiza Portugál Ba Adeptu Sira
Iha oportunidade ne’e Xanana hato’o parabéns fahe kamiza Portugál nian ba adeptu Timoroan sira ne’ebé kontinua asiste jogu Portugál manan Swiss 6-1.
“Ita hato’o parabéns no viva ba Portugál tanba ohin manan Swis 6-1, ita pawai rame-rame, maibé labele halo problema, ita akompaña nafatin jogu sei mai bola ne’e kabuar se mak atu manan,” dehan Xanana hodi kontinua fahe kamiza ba adeptu sira.
Iha fatin hanesan, Prezidente Autoridade Munisipiu Lautem, Domingos Xavio hato’o agradese ba klube 32 ne’ebé hatudu komportamentu durante eventu halo too termina.
Domingos agradese ba esforsu di’ak hotu ne’ebé Maun Boot Xanana halo hodi lori unidade ba karii iha joventude sira nia leet.
“Ha’u hato’o parabéns no benvindo ba Kaka Lafai, Xanana ne’ebé hatudu nia domin boot mai realiza eventu desportu ne’e iha ita nia leet no munisipiu sira seluk. Jogu ne’e importante tebes hodi hametin imi joventude ninia unidade maka importante liu,” nia hatete.
Prezidente Autoridade Lautem ne’e mós agradese ba patrosinador sira hanesan, York Tansport, In-Canto, Jonize no emprezariu Lautem oan tomak ne’ebé fó apoiu masimu ba juventude sira ne’ebé partisipa ona iha jogu ne’e.
Enkuantu, jogu ne’e termina ho serimónia entrega taxa no osan ba manan na’in FC Tokodede hetan $1500, Segundu Lugar FC Boca Junior hetan $1000 no terseiru lugar AC Mailua hetan $500 no kontinua ho programa kosertu muzika ne’ebé hananu hosi Artista Cidalia Gonsalves no Lola Cancio.
