Portavós ekipa médiku Xina, Huang Dan hateten, sidadaun xina ne’ebé hela iha Timor-Leste foin hala’o viajen husi estranjeiru ne’ebé pasa-revista iha pontu entrada sira tenke izola an iha uma durante loron 14 maka bele sai ba fatin públiku sira.
Nia dehan, objetivu ne’e atu bele prevene Virus Corona atu labele hada’et ba komunidade sira seluk iha Timor-Leste.
Inisiativa ne’e hanesan atitude ne’ebé responsavel no bele kontribui ba saúde no seguransa públiku no medida prevensaun atu ema hotu prátika iha komunidade internasionál.
“Ami husu ba sidadaun xina iha Timor-Leste atu izola-aan durante loron 14 iha Timor-Leste bainhira fila husi xina mai”, dehan nia, iha Ospitál Nasionál Guido Valadares (HNGV), horisehik.
Dan dehan, kuandu izola-aan iha uma periodu ne’e labele partisipa han hamutuk, simu bainaka, no ba fatin públiku. Tenke uza máskara no evita ko'alia oin hasoru malu iha distánsia ne’ebé besik.
Durante períodu iha prosesu izolamentu tenke atensaun ba limpeza no ijiene ambiente uma laran no kontrola temperatura isin. Bainhira sente sintoma isin manas no difikuldade ba dada iis no mear tenke uza máskara no imediatamente ba ospitál.
Nia informa, iha fulan-Dezembru 2019, sidade Wuhan, Provínsia Hubei, kontinua deskobre pasiente husi kazu pneumonia ne’ebé afetada husi Virus Corona ho propagasaun husi epidemia rejiaun seluk husi xina nian no esterior deskobre hotu kazu ne’e.
Moras ne’e agora inklui mós ba moras infesioza husi klase B ne’ebé estipula iha lejizlasaun ba prevensaun no kontrola moras infesioza iha Repúblika Populár Xina komesa toma ona medida prevensaun no kontrola ba moras infesioza husi klase A.
Iha Xina, agora provínsia 30 komesa fo resposta ba primeiru nivel prinsipal iha emerjensia saude publika. Governu Xina halo esforsu atu impede epidemia atu labele espalla no garante saude seguransa ema nian.
Nia dehan, Corona Virus foun, antes ne’e nunka hetan iha saúde ema nian no virus ne’e kauza surtu husi pneumonia iha Wuhan iha Dezembru 2019 no Organizasaun Saúde Mundiál (OMS) deskobre Virus Corona foun ne’e hanaran 2019-nCoV.
Huang Dan esplika, tuir analiza husi sentru ba prevensaun no kontrolu ba moras iha Xina konfirma katak Virus Corona ne’e tranzmite gotikulas ka kontaktu maski moras ne’e nia orijen la klaru no nia iha kapasidade atu espalla ba ema no virus ne’e espalla iha insitasaun medika no komunidade.
Virus Corona ne’e atualmente laiha ai-moruk no vasina ba prevensaun. Sentru ba prevensaun no kontrolu ba moras lansa ona projetu ba peskiza vasina nian maski agora daudaun ne’e médiku espesialista ba tratamentu relasaun ho moras Corona, Governu Xina divulga ona planu ofisial diagnóstiku no tratamentu.
Ekipa médiku Xina apela ba povu Timor-Leste atu toma atensaun kuidadu saúde hanesan fase-liman loron-loron, atensaun ijiene pesoál, uza máskara halo ezersísiu no haforsa imunidade isin labele tun. Karik sintoma ruma mosu lalais ba fasilidade saúde atu bele hetan tratamentu.
