ME ‘Bandu’ Estudante Labele Prense Aula liu Na’in 50 • Eskola Balun Halerik Fasilidade Featured

By Cesarina de Carvalho Fevereiru 01, 2024 61
Estudante sira iha eskola 04 de Setembru UNAMET Balide, Dili. Foto:Dok. Estudante sira iha eskola 04 de Setembru UNAMET Balide, Dili. Foto:Dok.

DILI: Ministériu Edukasaun (ME) liuhusi Sekretária Estadu Edukasaun Ensinu Sekundáriu Jerál no Eskola Tékniku Vokasionál, (SEEESJ-TV) bandu manorin na’in sira atu akumula estudante liu na’in lima nulu hodi prense kada aula ida, tanba sei foti asaun ba eskola sira iha teritoriu tomak ne'ebé la kumpri despaixu husi Ministériu Edukasaun.

Sekretariu Estadu Edukasaun Ensinu Sekundáriu Jerál no Eskola Tékniku Vokasionál, Domingos Lopes Lemos hatete, relasiona ho despaixu ne'ebé ME hasai katak iha eskola kada aula tenke prense estudante hamutuk 45 labele liu 50 ba leten.

"Sirkulár iha ona no hatun ona ba eskola sira hotu atu labele prense sala aula liu 50. Governu liuliu ME sei foti asaun ba ida nee. Depois ami sei haruka ami-nia ekipa sira sei tuun ba eskola atu haree tanba despaisu antes de matrikulasaun ne’e, ME fo ona ba eskola sira hotu atu nune’e vagas ne'ebé ME termina ne’e, kada eskola tenke kumpri ida ne’e," dehan nia iha Comoro, Kuarta (31/01).

Nia subliña, Eskola Sekundária Jerál sai problema boot, tanba kada sala de aula tenke prense estudante hamutuk 60 ka 70 ate to’o 80.

"Barak hanesan ne'e proveitamentu ne’e iha ne’ebé? Sira aproveita saida iha ne'eba? La aproveita buat ruma! Tanba ne'e ita sei haree no tau atensaun ba buat sira ne'e hotu," nia dehan.

 Aleinde Ministériu Edukasaun mós sei kordena ho Sekretáriu Estadu Terras no Propriedades (SETP) no seguransa sira atu haree komunidade ne'ebé hela iha areadores eskola nia.

"Ami sei kordena di’ak ho terras propriedades no seguransa sira atu haree komunidade sira ne’ebé hela iha areadores eskola. Ita labele haruka sira no ba duni sira sai deit," nia hatutan.

Agora seidauk bele liberta ka hasai komunidade ne'ebé hela iha areadór eskola tanba komunidade mós kuandu governu liberta husi areadores eskola ne’e presiza prepara mós kondisaun ruma ba sira.

Iha sorin seluk, Diretor Servisu Edukasaun Munisipiu Dili, Carlito Soares, hatete, loos duni iha Eskola Sekundáriu Jerál balun prense aula to'o 50 ou 70 ba leten maibé ne'e la'os tanba sira la kumpri despaixu husi ME.

"Eskola Sekundáriu Jerál balun sei prense aula ne'e ema barak liu, ne'e la’os sira la kumpri despaixu maibé kondisaun mak hanesan ne'e, maibé ita sei haree ida ne'e hodi rezolve," nia deklara.

Tanba kada aula mak prense ema barak, estudante la hetan oportunidade balun ba aprende. Nune'e solusaun ne'e fila fali ba Ministériu Edukasaun.

Iha fatin seluk, Diretór eskola 10 de Dezembro Comoro, Martinho Corsino hatete, dadaun ne'e eskola 10 Dezembru kada aula prense estudante 50 balun 60 tanba kondisaun la permite atu fahe estudante.

"Agora ita atu fahe hanusa? fatin la to'o profesór sira mós la to'o, ne'ebé ita mantein de’it hanesan ne'e hodi hein desizaun husi parte governu, tanba kondisaun mak hanesan ne’e ona la’os ami mak la kumpri despaisu husi Ministériu Edukasaun, lae," nia argumenta.

Nune'e, diretór ne'e husu ba Ministériu Edukasaun atu rezolve lalais mós profesór kontratadu sira-nia problema nune'e eskola 10 Dezembro bele iha fali manorin na’in ba matéria iha ‘area língua nia inklui bele fahe estudante ba kada aula tuir despaisu husi ME, atu labele afeta ba estudante sira nia prosesu apredisajen.

Entretantu Diretora EBS Faról, Filomena Fátima Belo Freitas hatete, eskola dadaun ne’e menus profesór  hamutuk na’in 17, no profesór hirak-ne’e menus dezde VII Governu nia tempu kedas to’o agora, tanba iha profesór balun mate no balun moras tan ne’e tan ne’e labele hanorin ona.

Diretora afirma, durante ne’e eskola halo bebeik pedidu ba Ministériu Edukasaun (ME) atu koloka profesór ba iha eskola refere maibé la iha resposta.

“profesor sira barak mak mate no moras ne’e ami hanorin taka bá mai de’it, maibé agora hapara tan ona entaun dadauk profesór na’in 17 mak menus, no profesór ne’e ba matéria, matemátika, inglés portugés no desportu, matéria ida ne’ebé mak importante ba ezame nasionál,” dehan diretora iha EBS Faról.

 

Rate this item
(0 votes)
Last modified on Tersa, 06 Fevereiru 2024 10:58

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30